"ჩვენ მოქმედი კანონებისა და წესების ფარგლებში უნდა მივიღოთ ის გადაწყვეტილებები, რასაც უფლებამოსილი ადამიანები იღებენ. იმის იქით პწკენები, ჭორაობები და ამბები, საქმეს არანაირად არ არგებს", - ასე გამოეხმაურა პარლამენტის თავმჯდომარე დავით უსუფაშვილი საკონსტიტუციო სასამართლოს თავმჯდომარის ბრალდებას მის მიმართ ზეწოლასა და შანტაჟთან დაკავშირებით. უსუფაშვილმა ეს პარლამენტში აკრედიტებულ ჟურნალისტებთან შეხვედრისას დღეს, 7 მარტს, განაცხადა. ჟურნალისტებმა პარლამენტის თავმჯდომარეს კითხეს, უნდა დაიწყოს თუ არა გამოძიება გიორგი პაპუაშვილის განცხადების საფუძველზე. მან ამ კითხვას პირდაპირი პასუხი არ გასცა.

საკონსტიტუციო სასამართლოს თავმჯდომარემ რამდენიმე დღის წინ რუსთავი 2-ის პირდაპირ ეთერში თქვა, რომ იუსტიციის მინისტრის თეა წულუკიანის დავალებით, გარკვეული პირები მისი პირადი ცხოვრების მასალების გასაჯაროებას გეგმავენ.

"მე გამოვრიცხავ, რომ თეა წულუკიანი, როგორც მინისტრი და როგორც პიროვნება შეიძლება იყოს ჩართული, თანამონაწილე რაიმე პროცესის, რომელსაც შეიძლება მიეცეს შანტაჟის კვალიფიკაცია. რაც შეეხება საკონსტიტუციო სასამართლოს თავმჯდომარის განცხადებას იმ პროცესის თაობაზე, რომლის ამოცანა იყო და არის სტრასბურგის სასამართლოში საქართველოდან წარმომადგენლის შერჩევა, ამას ძალიან ბევრი აჟიოტაჟი მოყვა, რომელიც სიმართლე გითხრათ, ხანდახან საგონებელში მაგდებს. ნუთუ შეუძლებელია, რომ ხანდახან მაინც შევჯერდეთ იმაზე, რომ რაღაც თამაშის, კონკურენციის წესები იყოს ნათელი და მერე ამ წესების შედეგებს დავემორჩილოთ ყველა, ვინც კმაყოფილი, ან უკმაყოფილო დავრჩით", - განაცხადა პარლამენტის თავმჯდომარემ. მისივე თქმით, ვინმეს მოსწონს თუ არ მოსწონს, უნდა დაემორჩილოს გადაწყვეტილებებს, ხოლო თუ ის ამ პროცესს საერთოდ არ ენდობა, მონაწილეობაც არ უნდა მიიღოს.

რამდენიმე დღის წინ სპეციალურმა კომისიამ წარმოადგინა 5-კაციან კანდიდატთა სია, საიდანაც უნდა შეირჩეს ერთი ადამიანი, რომელიც სტრასბურგის ადამიანის უფლებათა სასამართლოში საქართველოს წარმომადგენელი იქნება. საკონსტიტუციო სასამართლოს თავმჯდომარე აღნიშნულ კონკურსში მონაწილეობდა, თუმცა, როგორც ცნობილი გახდა, კომისიაში შემავალმა იუსტიციის მინისტრმა და მთავრობის საპარლამენტო მდივანმა მას მინიმალური ქულები დაუწერეს, რის შემდეგაც პაპუაშვილი კონკურსს გამოეთიშა.