თბილისის სააპელაციო სასამართლოში გიორგი ბაჩიაშვილის სასამართლო პროცესი მიმდინარეობს. საზოგადოებრივ მაუწყებელს და იმედს გიორგი ბაჩიაშვილის სასამართლო პროცესის გადაღების უფლება მისცეს — ეს პირველი შემთხვევაა, რაც კანონში ცვლილებების შემდეგ მედიას სასამართლო პროცესის გადაღების უფლება აეკრძალათ.

თანაინვესტირების ფონდის ყოფილი ხელმძღვანელი სასამართლო პროცესზე სიტყვით გამოვიდა:

"ჩემ გარშემო პროცესები დაიწყო 2 წლის წინ. ჯერ კიდევ მაშინ რაღაც გარკვეული დემოკრატიის შირმა ჰქონდა ჩვენს მთავრობას შენარჩუნებული. მე მაშინვე დავიწყე იმაზე საუბარი, თუ რა მიზეზით დაიწყო ეს დევნა ჩემ წინააღმდეგ. ამ დევნის მიღმა რეალური მიზეზი არის პოლიტიკური და პირადი შურისძიება.

პირადი შურისძიებაა იქიდან გამომდინარე, რომ მე უარი ვთქვი იმ დროს ანტიდასავლურ პროპაგანდაზე და ანტიდასავლურ ქმედებებზე, რომლისთვისაც დღეს უკვე მთელი ჩვენი მთავრობა, ბევრი თქვენი კოლეგა [მიმართავს მოსამართლეებს] და ბევრი ამ პატივცემულის [პროკურორი] კოლეგა არის დასანქცირებული.

დღეს უკვე აღარც ერთი საერთაშორისო ინსტიტუტისთვის, აღარც ერთი საქართველოში არსებული დამოუკიდებელი ინსტიტუტისთვის, სამწუხაროდ, სასამართლოს ნდობა არის ძალიან დაბალ დონეზე.

მე პირადად ნული მაქვს მთელი საქართველოს მართლმსაჯულების სისტემის ნდობა, თქვენი პირადი დიდი პატივისცემის მიუხედავად.

არ დარჩა არც ერთი ინსტიტუტი, რომელმაც არ შეაფასა ეს შეკერილი საქმე, რომელშიც არ არის არც ერთი პირდაპირი მტკიცებულება, გარდა ივანიშვილის ჩვენებისა. ეს გასამართლება სრულად პოლიტიკური და შეკვეთილი სამართლის ცხადი მაგალითია.

ამას დაემატა, რომ როდესაც მე, მე მართლა არ დამიტოვებია საქართველო 2 წლის მანძილზე თითქმის, მხოლოდ მაშინ გავხდი იძულებული, როცა პირდაპირ მომივიდა ინფორმაცია, ციხეში შენს წამებას აპირებენო. გაგჭყლიტავ ციხეშიო, პირდაპირ მასე თქვესო, ზუსტად ამ სიტყვების მერე გადავწყვიტე ქვეყნის დატოვება, მომიწია ქვეყნის დატოვება.
და რა მოხდა ამის შემდეგ — თვალზე მეშოკჩამოფარებული მატარეს 2 დღე აბუ დაბიში და დუბაიში, არანაირი ადვოკატის, არანაირი მოსამართლის და პროკურორის შეხვედრის უფლების გარეშე და პირდაპირ, ძალით, შემათრიეს "აირზენას" თვითმფრინავზე, სადაც დამხვდა ანრი ოხანაშვილი და რამდენიმე მაღალჩინოსანი. ყველანაირი კანონის დარღვევით მე თქვენს წინაშე ვდგავარ მოტაცებული. მე დღეს პატიმარი არ ვარ, მე ვარ ტყვე, მინდა, რომ ეს იცოდეთ. ასეა ყველანაირი საერთაშორისო კანონმდებლობით. ვითომ რომ მიპოვეს თეთრი მაისურით და თეთრი ფეხსაცმლით სადღაც მდინარე გადმოცურული, ესაა სიცრუე და ამ მოტაცებაზე გამოძიების დაწყება ვითხოვე ჯერ კიდევ 29 მაისს, როდესაც ჩემი სასამართლო სხდომა იყო სხვა საქმეზე. არც ერთი ადამიანი, არც მე არ დავკითხულვართ, არც ჩანაწერი ამოღებულა, არც დაზარალებულად არ ვცნობილვარ, არანაირი პროცედურა არ შემდგარა.

შემდგომ, როცა აქ ჩამომიყვანეს, ტყვეობაში მომიწყვეს წამება 11 ივლისს. ქსნის საპყრობილიდან საგულდაგულოდ ჩამოიყვანეს ჯალათი, პირდაპირ გაიღო კამერის კარი, დამიწყო გინება, ცემა, შუშით დამუქრება, გამიტეხა თავი, ხელი გამიჭრა და მრავალი სხვა დაზიანება მაქვს მიღებული," — თქვა ბაჩიაშვილმა.

დღევანდელ სასამართლო პროცესზე "ბიტკოინების საქმეზე" მეორე ინსტანციაზე გამოტანილ განაჩენს განიხილავენ. ბაჩიაშვილის ადვოკატის, დავით ჯანდიერის ინფორმაციით, ბაჩიაშვილის პროცესი 2-ჯერ გადაიდო "ტექნიკური მიზეზების გამო". ჯანდიერი ვარაუდობს, რომ სასამართლო პროცესის გადადების მიზეზი თავდასხმის შემდეგ ბაჩიაშვილს მძიმე ფიზიკური დაზიანებები აღენიშნებოდა.

"როგორც ეს მედიით გაჟღერდა, დასაშვებია ვივარაუდოთ, რომ სხდომის გადადება უკავშირდებოდა მის ფიზიკურ მდგომარეობას, რომელიც თვალსაჩინო იქნებოდა დამსწრეებისთვის," — წერს ჯანდიერი.