საქართველოს ახალგაზრდა იურისტთა ასოციაცია განცხადებას ავრცელებს და 17 ივლისს სასამართლო პროცესზე მოწმე გდდ-ის თანამშრომლების მიერ ჩაფხუტების დანომვრასთან დაკავშირებულ კომენტარს ეხმაურება. ასოციაციის თქმით, საიდენტიფიკაციო ნომრების მითითება ისეთ ადგილას, სადაც იგი ხილული არ არის ვერ ჩაითვლება სახელმწიფოს მიერ გატარებულ ეფექტიან პრევენციულ ზომად.

"თუ ჩავთლით, რომ გდდ-ს თანამშრომლებს მაიდენტიფიცირებელი აღნიშვნა აღჭურვილობაზე გაკეთებული აქვთ ისეთი ზომით/ფორმით ან ისეთ ადგილას, სადაც იგი ხილული არ არის გარეშე პირისთვის, ასეთი ფორმით საიდენტიფიკაციო ნომრების მითითება ვერ ჩაითვლება სახელმწიფოს მიერ გატარებულ ეფექტიან პრევენციულ ზომად, რადგანაც იგი ვერ უზრუნველყოფს დამნაშავე პირების ამოცნობას.

თუ კი დავუშვებთ, რომ გდდ-ს ზოგიერთი დანაყოფი ატარებს ამომცნობ ნიშნებს, ზოგიერთი კი — არა, გაურკვეველი ხდება, რატომ არ აღუნიშნავთ ეს აქამდე სპეციალურ საგამოძიებო სამსახურს, სახალხო დამცველს ან/და შსს-ს და რატომ არ შეიცავს აღნიშნულ ინფორმაციას შსს-ს ზემოთ განხილული წერილი," — წერია განცხადებაში

საია-ს განცხადებით, გენერალური პროკურატურა სამართალდამცავთა მიერ ჩადენილ დანაშაულებს უნდა იძიებდეს და საზოგადოებას გდდ-ის თანამშრომლების იდენტიფიკაციასთან დაკავშირებით ინფორმაცია უნდა მიაწოდოს.

"მნიშვნელოვანია, გენერალურმა პროკურატურამ, როგორც უწყებამ, რომელიც სპეციალური საგამოძიებო სამსახურის გაუქმების შემდეგ, 2025 წლის 01 ივლისიდან, უნდა იძიებდეს სამართალდამცავთა მიერ ჩადენილ დანაშაულებს, მათ შორის, აქციების კონტექსტში, საზოგადოებას მიაწოდოს სრული ინფორმაცია გდდ-ის თანამშრომლების იდენტიფიკაციასთან დაკავშირებით," — წერია განცხადებაში.

ცნობისთვის, აქციებთან დაკავშირებით დაკავებული 11 პირის სასამართლო პროცესზე 17 ივლისს ბრალდების მხარის მოწმეებმა, გდდ-ს თანამშრომლებმა, ლაშა გელაშვილმა და გიორგი გობრონიძემ, განაცხადეს, რომ გდდ-ს ჩაფხუტებზე მითითებული იყო საიდენტიფიკაციო ნომრები. გიორგი გობრონიძემ ასევე მიუთითა, რომ ნომერი ჩაფხუტის უკანა მხარეს იყო მითითებული.