ირაკლი კობახიძემ ჟურნალისტებს განუცხადა, რომ ქართული ოცნების ჯგუფის ყოფილი წევრი კორუფციაშია მხილებული და დასძინა, რომ ეს პირი ლევან ხაბეიშვილს "აფინანსებდა". ჟურნალისტების კითხვაზე თუ ვინ არის ეს პირი, ოცნების პრემიერმა განაცხადა, რომ "უდანაშაულობის პრეზუმფციას" იცავს და მის ვინაობას არ დაასახელებს.

"მე არ დავაკონკრეტებ. გამოძიებამ უნდა დაადგინოს. მე იმიტომ არ ვსაუბრობ სახელებით და გვარებით, რომ ვიცავ უდანაშაულობის პრეზუმფციას. როდესაც საუბარია კორუფციასთან დაკავშირებულ ეჭვებზე, გამოძიება უნდა დაიწყოს შესაბამისმა უწყებამ. მე იმედი მაქვს, რომ სადაც იქნება საფუძვლიანი ეჭვი ყველგან დაიწყება გამოძიება," — თქვა კობახიძემ.

შემდეგ ჟურნალისტმა კობახიძეს დაუსვა კითხვა, შეესაბამებოდა თუ არა სიმართლეს ლევან ხაბეიშვილის მიერ გავრცელებული ინფორმაცია, რომ თორნიკე რიჟვაძის თვითმკვლელობის მცდელობისას მამუკა მდინარაძეც საგარეჯოში იმყოფებოდა.

"ეს არის ისეთი ტყუილი რომ რა ვიცი. ვინ გაავრცელა?! ლევან ხაბეიშვილმა, რომლის მეტსახელი არის ანიტა. მე არ მიმიყენებია მისთვის შეურაცხყოფა, სახელფასო უწყისში ლევან ხაბეიშვილი მითითებული იყო როგორც ანიტა. ეს იყო ერთგვარი ნახევრად ფორმალური სახელფასო უწყისი. ის 5000 ლარს იღებდა ყოველთვიურად და დღემდე გრძელდებოდა მისი დაფინანსება კონკრეტული წყაროდან, რომელიც ეჭვმიტანილია კორუფციაში. კი, [ჩვენი გუნდის] ყოფილ წევრზეა საუბარი.

არცერთ სახელს და გვარს არ ვამბობ, ერთადერთი რა სახელს და გვარსაც ვამბობ, ეს არის ლევან ხაბეიშვილი და ნოდარ მელაძე, რომელიც ყოველთვიურად იღებდნენ დაფინანსებას. კიდევე ერთხელ გავიმეორებ, თუ ვინმეს ეგონა... კორუფცია არ არჩევს... სახელფასო უწყისი მაქვს ნანახი ხაბეიშვილის შემთხვევაში, მელაძეზე ვიცი. უწყისი არ ამიღია, ვიცი, რომ იღებდა ყოველთვიურ დაფინანსებას და დღემდე იღებს. არც თუ არასანდო ინფორმაცია მაქვს ამასთან დაკავშირებით, საკმაოდ საიმედო... არც თუ არასანდო — ორმაგი უარყოფა ნიშნავს..." — თქვა კობახიძემ.