"35 წელი ჩვენს სამუშაო ოთახებს ერთი კედელი ჰყოფდა, 30 წელი ბიზნესში და ბოლო 5 წელი პარტიაში. აქაც, ციხეშიც გვერდიგვერდ ვართ ისე, რომ ვერ ვკონტაქტობთ... თუმცა, ბრძოლას აქედანაც ვაგრძელებთ!" — ამის შესახებ კოალიცია ლელო — ძლიერი საქართველოს ლიდერი მამუკა ხაზარაძე ციხიდან გამოქვეყნებულ წერილში წერს და მის თანაგუნდელს, ბადრი ჯაფარიძეს დაბადების დღეს ულოცავს.

"35 წელი ჩვენს სამუშაო ოთახებს ერთი კედელი ყოფდა, 30 წელი ბიზნესში და ბოლო 5 წელი პარტიაში. აქაც, ციხეშიც გვერდიგვერდ ვართ ისე, რომ ვერ ვკონტაქტობთ... თუმცა, ბრძოლას აქედანაც ვაგრძელებთ!

ადვოკატები მეუბნებიან, როგორ სულ ემთხვევა თქვენი პოზიციებიო. ეს არცაა საკვირველი.
ჩვენ ერთად ბრძოლის დროს ხშირად გვიკამათია, მაგრამ არასდროს ქვეყნის მომავალზე — თუ როგორ ვხედავთ გამარჯვებული და ძლიერი საქართველოს მშენებლობას და ქართველების ბედნიერ მომავალს ამ უნიკალურ ქვეყანაში.

დღეს შენი დაბადების დღეა! 65 წლის გახდი...

პირველ რიგში მინდა მადლობა გითხრა, რომ ასეთი მაგარი ქართველი ხარ და მოგილოცო მთელი გულით.

ჩვენ აუცილებლად გავიმარჯვებთ — ამ ქვეყნის გამარჯვებისთვის! შენ დამოუკიდებლობის აქტის ხელმომწერი ხარ და სხვანაირად არ ძალგიძს.

დიდხანს იცოცხლე და იხარე შენს ოჯახთან ერთად!

შენი ძმა, მამუკა!" — წერს მამუკა ხაზარაძე.

შეგახსენებთ, 23 ივნისს, ოცნების პარლამენტის საგამოძიებო კომისიაზე გამოუცხადებლობისთვის თბილისის საქალაქო სასამართლოს მოსამართლემ, ზვიად შარაძემ, ლელო — ძლიერი საქართველოს ლიდერებს 8-8 თვით პატიმრობა მიუსაჯა და 2 წლით აუკრძალა საჯარო სამსახურში თანამდებობის დაკავება. პროცესს თავად პოლიტიკოსები არ ესწრებოდნენ. მათ გადაწყვეტილება პარტიის ოფისში მოისმინეს, სადაც იმავე დღეს, სამართალდამცველებმა ხელზე ბორკილები დაადეს. ამავე საქმეზე ციხეში არიან კოალიცია ცვლილებისთვის ლიდერები — ნიკა გვარამია, ნიკა მელია, ზურაბ გირჩი ჯაფარიძე, სტრატეგია აღმაშენებლის ლიდერი გიორგი ვაშაძე, ოპოზიციონერი პოლიტიკოსი გივი თარგამაძე და თავდაცვის ყოფილი მინისტრი ირაკლი ოქრუაშვილი.