გასულ შაბათ-კვირას ბრიტანეთის უდიდესი მუსიკალური ფესტივალი — გლასტონბერი გაიმართა. შესანიშნავი შესრულებებით, პოლიტიკური სკანდალებითა და სიურპრიზებით სავსე 4-დღიანმა ფესტივალმა იმედგაცრუებული არავინ დატოვა. წლევანდელმა გლასტონბერიმ არაერთი დასამახსოვრებელი მომენტი გვაჩუქა:

2 წლის წინ, გლასტონბერის დიდ სცენაზე მდგარი ლუის კაპალდი ცდილობდა ტურეტის სინდრომისგან გამოწვეული კანკალი შეეწყვიტა, რათა პერფორმანსი დაესრულებინა, რისი გაკეთებაც ფანების დახმარებით შეძლო. ამის შემდეგ კაპალდიმ განაცხადა, რომ მენტალურ და ფიზიკურ ჯანმრთელობაზე ზრუნვასა და ტურნეებისგან შესვენების აღებას აპირებდა. ამის შესახებ ოფიციალურად არავინ იცოდა, თუმცა რატომღაც ბევრი მოელოდა და მართლაც, 2 წლის შემდეგ, 2025 წელს კაპალდი გლასტონბერის სცენას დაუბრუნდა, რათა "დაესრულებინა ის, რისი დასრულებაც წარსულში ვერ შეძლო". მომღერალმა შეასრულა თავისი ჰიტები — Before You Go, Hold Me While You Wait და Someone You Loved, ასევე წარადგინა ახალი სიმღერა — Survive.

"ბევრს არაფერს ვიტყვი, თორემ ალბათ ტირილს დავიწყებ. თქვენთან ერთად ყოფნა გასაოცარია, არ ვიცი როგორ გადაგიხადოთ მადლობა ჩემს სანახავად მოსვლისთვის. იმედია, მეორე ცდა მაინც გაამართლებს", — მიმართა მომღერალმა ფანებს.

ფესტივალის ერთ-ერთ გამორჩეულ ნაწილად ოლივია როდრიგოს გამოსვლაც სახელდება. კვირა საღამოს მან მსმენელებს მოულოდნელი სტუმარი წარუდგინა — ლეგენდარული ბენდის The Cure-ის სოლისტი რობერტ სმიტი. ახალგაზრდა მომღერალმა სმიტს გლასტონბერის ლეგენდა და მისი პირადი გმირი უწოდა. მათ The Cure-ის ცნობილი სიმღერები შეასრულეს — Friday I’m in Love და Just Like Heaven. წყვილის პერფორმანსმა, როგორც ფესტივალზე, ისე ინტერნეტსივრცეშიც დიდი გამოხმაურება და მოწონება დაიმსახურა.

პარასკევ დილას ყველასთვის სიურპრიზი აღმოჩნდა Lorde-ის სცენაზე გამოსვლა და ახალი ალბომის, Virgin-ის შესრულება. მისი პერფორმანსის შესახებ ინფორმაცია მხოლოდ წინა ღამეს გავრცელდა, თუმცა დილის 12-ის ნახევარზე მის მოსასმენად მაინც უამრავი ადამიანი შეიკრიბა, იმდენი, რომ Lorde-ის სცენასთან ახლომდებარე არენის დახურვა მოუწიათ. "ამ ალბომისთვის ბევრი გავიღე. სიმართლე გითხრათ, არც ვიცოდი, ოდესმე თუ კიდევ შევქმნიდი ალბომს, თუმცა დავბრუნდი და სრულიად თავისუფალი ვარ. მადლობა, რომ დამელოდეთ", — განაცხადა მომღერალმა.

ყურადღების ცენტრში მოექცა Bob Vylan-ისა და Kneecap-ის სეტების დროს გაკეთებული პოლიტიკური განცხადებებიც, განსაკუთრებით კი ღაზას ომთან დაკავშირებულ კომენტარები. მას შემდეგ, რაც Kneecap-ის ერთ-ერთ წევრს ბრიტანეთის ტერორიზმის აქტის თანახმად ბრალი წაუყენეს ჰეზბოლას დროშის აღმართვისთვის, BBC-მ გადაწყვიტა, რომ არ გაეშუქებინა ჯგუფის სცენაზე გამოსვლა. მიუხედავად ამისა, მუსიკალურმა დუომ Bob Vylan-მა, რომელიც Kneecap-მდე გამოვიდა სცენაზე და რომლის პერფორმანსიც ტელევიზიაში გადაიცემოდა — კიდევ უფრო დიდი გამოხმაურება დაიმსახურა.

ბრიტანულმა პანკ-დუეტმა ხალხს მოუწოდა, ეყვირათ შემდეგი ფრაზები: "სიკვდილი, სიკვდილი ისრაელის თავდაცვის ძალებს", "თავისუფლება, თავისუფლება პალესტინას", "მდინარიდან ზღვამდე, პალესტინა თავისუფალი უნდა იყოს". გამოსვლამ სოციალურ მედიაში დიდი უკმაყოფილება გამოიწვია; ბევრმა ეს მოწოდებები ანტისემიტურად შეაფასა, სხვებმა კი ჯგუფი პალესტინის მხარდაჭერისთვის შეაქეს.

ფესტივალმა მოგვიანებით დაგმო ეს განცხადებები, BBC-მ კი მათი ეთერიდან მოხსნის სურვილი გამოთქვა. ამ გამოსვლის შემდეგ Bob Vylan-თან კონტრაქტი გაწყვიტა მათმა სააგენტომ, ხოლო პოლიციამ დაიწყო ოფიციალური გამოძიება Bob Vylan-ისა და Kneecap-ის მიერ გაკეთებულ კომენტარებთან დაკავშირებით.

პოლიტიკა მთელი ფესტივალის განმავლობაში ერთ-ერთი მთავარი თემა იყო. მრავალმა სხვა შემსრულებელმაც გამოიყენა თავისი სასცენო დრო პალესტინის თავისუფლება მოსათხოვნად. თუმცა, პარასკევი საღამოს მთავარმა შემსრულებლებმა განსხვავებული გზა აირჩიეს — The 1975, რომელიც წარსულში არასდროს ერიდებოდა აქტუალურ მოვლენებზე საჯაროდ საუბარს, როგორც ჩანს, ასე გაგრძელებას აღარ აპირებს.

ბენდის სოლისტმა განაცხადა: "მაყურებლებს შეიძლება იმედი გაუცრუვდეს, რომ ამ შოუს განმავლობაში პოლიტიკაზე არ ვისაუბრებთ, არც შემდეგ შოუებზე და არც მათ შემდეგებზე. მინდა იცოდეთ, რომ ეს შეგნებული გადაწყვეტილებაა". მიზეზად ასახელებს:

ამ ყველაფრის შემდეგ ბენდმა თავისი ერთ-ერთი ყველაზე პოლიტიკური სიმღერა — Love It If We Made It შეასრულა, რომლის დროსაც დიდ ეკრანზე დონალდ ტრამპის, კანიე უესტისა და იმიგრაციასთან დაკავშირებული სირთულეების გამოსახულებები ჩანდა.

შაბათ-კვირის კიდევ ერთი მნიშვნელოვანი პოლიტიკური განცხადება მომღერალ-კომპოზიტორსა და მსახიობ ქეით ნეშს ეკუთვნის, რომელმაც განსაკუთრებით მწვავე სიტყვებით მიმართა ჰარი პოტერის შემქმნელ ჯოან როულინგს.

ნეშმა ცოტა ხნის წინ გამოუშვა ტრანსფობიის საწინააღმდეგო სიმღერა GERM, ხოლო ფესტივალზე განაცხადა:

მას შემდეგ, რაც ფესტივალი დასრულდა და 200 000-მა ადამიანმა ტერიტორიის დატოვება დაიწყო, ცარიელ მინდორზე უამრავი ნაგავი, მათ შორის ქაღალდის ჭიქები და საკვების ნარჩენები დარჩა. დამლაგებლებმა ნელ-ნელა გარემოს დასუფთავება დაიწყეს, რათა ტერიტორია ბრიტანეთის უდიდესი მუსიკალური ფესტივალის მასპინძლობის შემდეგ ისევ ფერმად გადაქცეულიყო.

გლასტონბერი 2026 წელს არ გაიმართება. ორგანიზატორების თქმით საჭიროა დრო, რათა ძალები აღიდგინონ და მსმენელს ბევრად გაუმჯობესებული ფესტივალი შესთავაზონ.