ბაქოში, რეიდების შედეგად, აზერბაიჯანის პოლიციამ ათობით გეი და ტრანსსექსუალი დააკავა. ადგილობრივი ლგბტ აქტივისტების ცნობით, რამდენიმე დღეში დაპატიმრებულთა რიცხვმა 100-ს გადააჭარბა. მათივე თქმით, პოლიცია აქტივისტებს ფიზიკურად უსწორდება და მათი მეგობრების კონტაქტების გაცემას აიძულებს.

რეიდებისა და დაკავებების მიზეზი On.ge-სთვის ჯერჯერობით უცნობია. ადგილობრივი ლგბტ ორგანიზაციის წარმომადგენელი ფეისბუკზე გავრცელებულ ვიდეოში ჰყვება, რომ რეიდები პირად საცხოვრებელ სახლებში და იმ საზოგადოებრივი ადგილებში მოხდა, სადაც გეი ადამიანები იკრიბებიან ხოლმე. ოჯახის წევრებსა და ადვოკატებს კი დაკავებულებთან ურთიერთობის შესაძლებლობას პოლიცია არ აძლევს.

ევრაზიანეტის ცნობით, აზერბაიჯანის პოლიცია უარყოფს, რომ დაკავებები სექსუალურ ორიენტაციასთანაა დაკავშირებული და დაპატიმრებულებს პროსტიტუციაში სდებს ბრალს.

"ჩვენს ქვეყანაში სექსუალური უმცირესობები არასდროს იდევნებოდნენ, თუმცა ეს იმას არ ნიშნავს, რომ ისინი კანონზე მაღლა დგანან", - განაცხადა აზერბაიჯანის შინაგან საქმეთა სამინისტროს წარმომადგენელმა.

ადამიანის უფლებადამცველი ორგანიზაციები ამბობენ, რომ პოლიცია, სახელმწიფოს მიერ კონტროლირებადი მედიის საშუალებით ცდილობს დაამკვიდროს აზრი, რომ თითოეულ დაკავებულს შიდსი, ან სხვა სქესობრივი გზით გადამდები დაავადება სჭირთ.

"ამ არსებების დაცვით, რომლებიც ამორალურობის, საშიში დაავადებების წყაროები არიან და რომლებიც ღმერთისგან არიან დაწყევლილები, დასავლური წრეები, ადამიანის უფლებების სახელით, ჩვენი ეროვნული ტრადიციების განადგურებას ცდილობენ", - განაცხადა იუსტიციის პარტიის თავმჯდომარის მოადგილემ.

2016 წელს, აზერბაიჯანი ევროპის ყველაზე ცუდ ქვეყანად დასახელდა ლგბტ მოქალაქეებისთვის. აზერბაიჯანში ჰომოსექსუალობა ლეგალური 2001 წელს გახდა, ქვეყანა ევროსაბჭოს წევრიცაა, რაც მას ადამიანის უფლებათა ევროპული კონვენციის დაცვას ავალდებულებს, თუმცა აზერბაიჯანის ხელისუფლება ლგბტ ადამიანების მიმართ სიძულვილით მოტივირებული დანაშაულისა და დისკრიმინაციის აღსაკვეთად თითქმის არაფერს აკეთებს.

2015 წელს, ევროპარლამენტმა რეზოლუცია გამოსცა, აზერბაიჯანში ადამიანის უფლებადამცველების მიმართ მოპყრობა დაგმო და განაცხადა, რომ განსაკუთრებით აღშფოთებულია ლგბტ ადამიანებთან დაკავშირებული სიტუაციით.