"ევროსკოპის" შეკითხვას, როგორ აფასებს ჩრდილო ატლანტიკური ალიანსი საქართველოში NATO-სა და ევროკავშირის საინფორმაციო ცენტრის დახურვას, NATO-ს ოფიციალური პირის პასუხი "ევროსკოპს" ასეთია:

"შეშფოთებული ვართ საქართველოს მთავრობის გადაწყვეტილებით NATO-სა და ევროკავშირის შესახებ საინფორმაციო ცენტრის დახურვასთან დაკავშირებით. ეს იქნება მნიშვნელოვანი დანაკარგი, განსაკუთრებით იმ დროს, როდესაც ქართველ ხალხს სჭირდება მეტი ფაქტობრივი ინფორმაცია ალიანსის და საქართველოს ევრო-ატლანტიკური მისწრაფებების შესახებ. 2005 წლის შემდეგ, როდესაც ცენტრი შეიქმნა, რეგიონული და ადგილობრივი ოფისების ქსელების ჩათვლით, ის საკვანძო როლს ასრულებდა საზოგადოების ცნობადობის გაძლიერებაში NATO-სა და მისი ორმხრივად სასარგებლო პარტნიორობის შესახებ საქართველოსთან. ცენტრი ღირებული პარტნიორია NATO-ს სახალხო დიპლომატიის სექციისთვის და NATO-ს სამეკავშირეო ოფისისთვის საქართველოში სახალხო დიპლომატიის ინიციატივების განსახორციელებლად. ქვეყნის რეგიონების მასშტაბით. ქართველმა ხალხმა მკაფიოდ განაცხადა, რომ სურს დემოკრატიული, აყვავებული მომავალი ევროპულ და ევრო-ატლანტიკურ ოჯახში. ეს სტრატეგიული მიზანი ასევე დევს საქართველოს კონსტიტუციაში", — ნათქვამია "ევროსკოპის" მიერ გავრცელებულ ინფორმაციაში.

ცნობისათვის 4 ივნისს გავრცელდა ინფორმაცია, რომ 1-ლი ივლისიდან "საინფორმაციო ცენტრის NATO-სა და ევროკავშირის შესახებ" ლიკვიდაცია იგეგმება — ამ მიზეზით "საინფორმაციო ცენტრის ნატოსა და ევროკავშირის შესახებ" ქვემო ქართლის რეგიონის წარმომადგენელი თემურ სუყაშვილი სამსახურიდან გაათავისუფლეს.

მოგვიანებით, "NATO-სა და ევროკავშირის შესახებ საინფორმაციო ცენტრის" დირექტორმა, თამარა წულეისკირმა განცხადება გაავრცელა, სადაც ნათქვამია, რომ "NATO-სა და ევროკავშირის შესახებ საინფორმაციო ცენტრის ფუნქციებს სამინისტროს ცენტრალური აპარატის ევროინტეგრაციის დეპარტამენტი განახორციელებს". მისივე თქმით, უწყებაში "რეორგანიზაციის პროცესი ხორციელდება სრულიად გამჭვირვალედ და თითოეულ თანამშრომელს მიეწოდება ინფორმაცია მიმდინარე ცვლილებების შესახებ".