დიდი ბრიტანეთის სახელმწიფო მინისტრი საგარეო საქმეთა, თანამეგობრობისა და განვითარების საკითხებში სტივენ დაუთი აცხადებს, რომ სრულიად მიუღებელია საქართველოს ხელისუფლების მიერ მშვიდობიანი დემონსტრანტების და ჟურნალისტების ძალადობრივი დარბევის გამო. ამის შესახებ ნეტგაზეთი წერს.

"ეს სრულიად მიუღებელია. საპასუხოდ, ჩვენ შევაჩერეთ საქართველოს მთავრობის პროგრამული მხარდაჭერა, შევზღუდეთ თავდაცვის სფეროში თანამშრომლობა და „ქართულ ოცნებასთან“ კავშირები. ჩვენ დავაწესეთ სავიზო აკრძალვები და სანქციები ზოგიერთ პირზე, ვინც პასუხისმგებელია ძალადობაზე, და ვაგრძელებთ საერთაშორისო პარტნიორებთან მუშაობას საქართველოში თავისუფალი სამოქალაქო საზოგადოებისა და მედიის მხარდასაჭერად", — განაცხადა დაუთიმ თემთა პალატაში გამართულ მოსმენაზე.

დიდი ბრიტანეთის მმართველი ლეიბორისტული პარტიის წევრმა პერან მუნმა სახელმწიფო მინისტრს ჰკითხა, იგეგმება თუ არა სანქციების დაწესება ბიძინა ივანიშვილის:

"გასულ თვეში ევროპის საბჭოში შევხვდი რამდენიმე ქართველ ოპოზიციონერს. მათ მაჩვენეს სასტიკი ფიზიკური ძალადობების გრაფიკული მტკიცებულებები. ბიძინა ივანიშვილი, პუტინის მიერ მხარდაჭერილი ოლიგარქი და საქართველოს დე ფაქტო მმართველი, აგრძელებს მშვიდობიანი პროტესტის ჩახშობას რუსეთის იდენტური მოქმედების ხერხებით. ძალადობა და დაშინება აზიანებს პოლიტიკურ პროცესს. შეერთებულმა შტატებმა სანქციები დაუწესა ივანიშვილს, მაგრამ ივანიშვილის სიმდიდრის დიდი ნაწილი განთავსებულია გაერთიანებული სამეფოს ან ბრიტანეთის ზღვისიქითა ტერიტორიებზე. შეუერთდება თუ არა გაერთიანებული სამეფო ჩვენს მოკავშირეებს და გაუყინავს აქტივებს ასეთ საზიზღარ ტირანს?", – განაცხადა პერან მუნმა (ნეტგაზეთის თარგმანი).

სახელმწიფო მინისტრმა თქვა, რომ დიდი ბრიტანეთი აგრძელებს საქართველოში განვითარებადი სიტუაციის მჭიდრო მონიტორინგს, თუმცა ვერ გააკეთებს კომენტარს შესაძლო სამომავლო სანქციებზე, რადგან ეს შეამცირებს მათ გავლენას.

შეგახსენებთ, რომ გაერთიანებულმა სამეფომ უკვე დაუწესა სანქციები ქართული ოცნების შს მინისტრ ვახტანგ გომელაურს, მის პირველ მოადგილეს, ალექსანდრე დარახველიძეს, თბილისის პოლიციის დეპარტამენტის უფროს სულხან თამაზაშვილს, განსაკუთრებულ დავალებათა დეპარტამენტის უფროს ზვიად ხარაზიშვილსა ("ხარება") და მის მოადგილე მილერი ლაგაზაურს.