სომხეთის პარლამენტმა უარყო სადავო კანონპროექტი, რომელიც სამხედრო სამსახურის მნიშვნელოვნად შემცირებას 62 000 აშშ დოლარის ოდენობის ანაზღაურების სანაცვლოდ ითვალისწინებს.

კანონპროექტი მაისის შუა რიცხვებში მმართველი პარტიის, "სამოქალაქო კონტრაქტის" პარლამენტის წევრმა, ჰაიკ სარგსიანმა წარადგინა.

საზოგადოებისა და ადამიანის უფლებათა დამცველების მხრიდან დიდი კრიტიკის მიუხედავად, კანონპროექტის შესწორებული ვერსია სომხეთის მთავრობამ 22 მაისს დაამტკიცა. ის ითვალისწინებდა სარგსიანის მიერ თავდაპირველად შემოთავაზებულთან შედარებით საფასურის კიდევ უფრო გაზრდას, ყველაზე მოკლე, ერთთვიანი სამსახურის საფასურად განისაზღვრა 24 მილიონი დრამი (დაახლოებით 62,000 დოლარი), ხოლო ოთხთვიანი სამსახურისთვის — 18 მილიონი დრამი (დაახლოებით 47,000 დოლარი), რის შემდეგაც ისინი სარეზერვო ძალებში მოხვდებოდნენ.

სომხეთში ამჟამად 18-27 წლის მამაკაცებისთვის სავალდებულო ორწლიანი სამხედრო სამსახური მოქმედებს.

მიუხედავად იმისა, რომ მთავრობამ წინადადებას თავდაპირველად მწვანე შუქი აუნთო, პარლამენტის თავდაცვისა და უსაფრთხოების მუდმივმა კომიტეტმა 13 ივნისს კანონპროექტი არ დაამტკიცა.

კომიტეტში მმართველი პარტიის ხუთმა დეპუტატმა მხარი დაუჭირა საკითხს, ოთხმა ოპოზიციონერმა დეპუტატმა წინააღმდეგ მისცა ხმა, ხოლო კომიტეტის თავმჯდომარემ, ანდრანიკ ქოჩარიანმა, თავი შეიკავა.

სომხეთის პარლამენტის მიერ კანონპროექტთან დაკავშირებული შემდგომი განხილვების შესახებ გაკეთებული დასკვნის თანახმად, კოჩარიანმა მოუწოდა სარგსიანს, შემოდგომის სესიამდე კანონპროექტი მიმოქცევიდან გაეტანა და დამატებითი განხილვების ჩატარება ურჩია, რადგან განაცხადა, რომ წინადადება "მრავალი ასპექტით პრობლემურია". სარგსიანმა რეკომენდაცია უარყო.

თუმცა, სამშაბათს, სარგსიანმა და კიდევ 86-მა დეპუტატმა კანონპროექტის პარლამენტის დღის წესრიგში შეტანის წინააღმდეგ მისცეს ხმა.

მმართველი პარტიის, "სამოქალაქო კონტრაქტის" სახელით, მისმა საპარლამენტო ლიდერმა, ჰაიკ კონჯორიანმა, განაცხადა, რომ ფრაქციამ კანონპროექტი შიდა წესრიგში განიხილა. მან აღიარა, რომ პროექტი შეიცავდა არმიის რეფორმაზე ორიენტირებულ ელემენტებს, რაც მათ პრიორიტეტებს შორისაა, თუმცა თქვა, რომ ფრაქციამ საბოლოოდ დაასკვნა, რომ "ამ ფორმით მისი მიღება არ შეუძლიათ"

მან ივარაუდა, რომ საკითხები დაკავშირებული იყო ზოგიერთ რეგულაციასთან, ფორმულირებასთან და განხილვის ვადებთან, დეტალების დაკონკრეტების გარეშე.

თავის მხრივ, სარგსიანმა აღნიშნა, რომ მან კანონპროექტზე მთავრობასთან განხილვა 2024 წლის იანვარში დაიწყო, მაგრამ არ ჰქონდა დრო, რომ კანონპროექტთან დაკავშირებით ყველა პარლამენტარ კოლეგასთან კონსულტაციები გაემართა.

"პრემიერმინისტრის მითითებებით, მე გავაგრძელებ ჩვენს კოლეგებთან მუშაობას, რათა რაც შეიძლება მალე განვახორციელოთ მთავრობის პროგრამაში ასახული რეფორმები და პრემიერმინისტრის მიერ ჩვენთვის დადგენილი სახელმძღვანელო პრინციპები", - განაცხადა სარგსიანმა და აღნიშნა, რომ ისიც კანონპროექტის წინააღმდეგ მისცემს ხმას. "თუ პარლამენტი ამ კანონს მიიღებს, ის არა მხოლოდ დააკოდირებს კლასობრივ დაყოფას, არამედ აღნიშნავს სამოქალაქო თანასწორობის, როგორც სახელმძღვანელო პრინციპის დასასრულს. თუმცა, უარყოფითი რეაქცია ასევე აჩვენებს, რომ საზოგადოებას ჯერ კიდევ ახსოვს 2018 წლის დაპირებები. ჯერ კიდევ არ არის გვიან მათი შესრულება“, - წერს ანდრანიკ შირინიანი, ადამიანის უფლებათა დამცველი და პოლიტიკის ექსპერტი, კანონპროექტის შესახებ თავის სტატიაში OC Media-სთვის.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.