გურჯაანის მკვიდრი, 86 წლის სირანა ბარბაქაძე ცხრა თვის წინ, სახელმწიფომ შეცდომით გარდაცვლილად გამოაცხადა. შესაბამისად, მას პენსია და სოციალური დახმარება მოუხსნეს. ამის შესახებ სიუჟეტი რუსთავი 2-ის ეთერით გავიდა:

"იანვარში გარდაცვლილი ვყოფილვარ, თებერვალი, მარტი, აპრილში უკვე ოპერაცია გავიკეთე - გარდაცვლილმა ოპერაცია გავიკეთე, მაისი, ხოლო ივნისი, ივლისი, აგვისტო და სექტემბერი, ამ ოთხ თვეში მე პენსია არ მიმიღია".

სიუჟეტის მიხედვით, პენსიას სირანა ბარბაქაძის შვილი იღებდა, გარდაცვალების ცნობა კი ბანკში ივნისში მიიტანეს. იმის გამო, რომ გარდაცვლილად იანვრიდან ითვლება, ხუთი თვის პენსიის დაბრუნებას სახელმწიფო ოჯახს უკან სთხოვს:

"თვალის ოპერაცია მაქვს გაკეთებული და ახლა იმდენი საშუალება აღარ მაქვს, რომ წამალი ვიყიდო. ვითხოვ, აღმიდგინონ იქ დარჩენილი პენსიები, იმდენი თვის და ახლანდელი პენსია".

რუსთავი 2-ის ჟურნალისტის ცნობით, ბარბაქაძის ოჯახმა არ იცის თუ ვინ დაუშვა შეცდომა. მათი ინფორმაციით, ადგილობრივი მუნიციპალიტეტიდან გარდაცვალების ცნობა საგარეჯოს იუსტიციის სახლში გააგზავნეს.

სოფელ ვეჯინის გამგებელი კუკური ჯამარტაშვილი რუსთავი 2-თან სატელეფონო საუბარში ამბობს, რომ ბოლო დროს, გამგებლებს ქელეხში აღარ ეპატიჟებიან და უჭირთ იმის გარკვევა თუ ვინ გარდაიცვალა სოფელში:

"აღარ ყოფილა ასეთი შემთხვევა საქართველოში თუ რა არის ვერ გავიგე? ვეჯინი გახდა ქრისტეს პერანგი? სამი მიცვალებული იყო იმ თვეში და შეგვეშალა მეზობლები. ადრეცკარგი იყო გვეპატიჟებოდნენ ქელეხზე, ქორწილში, ვიცოდით ვინ მკვდარი იყო ვინ ცოცხალი და ახლა აღარ გვეპატიჟებიან".