მექსიკაში მომხდარი მიწისძვრის შედეგად გარდაცვლილთა რიცხვი 230-მდე გაიზარდა. მეხიკოს სკოლა ერთ-ერთია იმ ათეულობით შენობიდან, რომელიც მთლიანად ჩამოინგრა და მის ნანგრევებში ამ დრომდე ეძებენ ადამიანებს. მათ შორის, 13 წლის გოგოს, რომელიც სავარაუდოდ, ცოცხალია. როგორც BBC წერს, სკოლის დანგრევის შედეგად, სულ მცირე, 21 ბავშვი და ხუთი ზრდასრული გარდაიცვალა.

მექსიკის პრეზიდენტმა ენრიკე პენია ნიეტომ, ქვეყნის მასშტაბით სამდღიანი გლოვა გამოაცხადა.

მეხიკოში სამაშველო ოპერაციები, ძირითადად, ენრიკე რობსმენის სახელობის საშუალო სკოლაში ტარდება, რომლის ნანგრევებთან შეკრებილი მშობლები თავიანთ შვილებზე ახალ ამბებს ელოდებიან.

ფოტო: Gerardo Carrillo / AP

სამოქალაქო დაცვის მოხალისე თანამშრომლის, ენრიკე გარდიას თქმით, ნანგრევების შემოწმების შედეგად დადგინდა, რომ გადარჩენილები ბეტონის ფილებს შორის არიან გაჭედილი. მისივე თქმით, ნანგრევებიდან, ვიღაცამ კედელზე რამდენჯერმე დააკაკუნა და ასევე, შუქის ჩანათების შემდეგ მათი ხმა გაიგეს.

მეხიკოს მერმა მიგელ ანხელ მაცერამ თქვა, რომ, ჯამში, 39 შენობა ჩამოინგრა და თითქმის ყველა მათგანის ნანგრევებში სამაშველო ოპერაციები მიმდინარეობს.

19 სექტემბერს, მექსიკაში მომხდარი 7,1 მაგნიტუდის სიმძლავრის მიწისძვრის შედეგად ყველაზე მეტი მსხვერპლი დედაქალაქ მეხიკოშია.

აშშ-ის გეოლოგიური კვლევითი ცენტრის ინფორმაციით, მიწისძვრის ეპიცენტრი მეხიკოდან 120 კმ-ის მოშორებით, პუებლაში იყო. ზუსტად 32 წლის წინ, მეხიკოში მომხდარმა მიწისძვრამ 10 ათასამდე ადამიანი იმსხვერპლა. მექსიკა მსოფლიოში ერთ-ერთი მჭიდროს დასახლებული ქალაქია, სადაც მოსახლეობის რაოდენობა 20 მილიონს აღემატება.