ისრაელის საზღვაო ძალებმა დააკავეს იახტა Madleen, რომელიც ღაზას სექტორისკენ ჰუმანიტარული ტვირთით მიემართებოდა. ნავში აქტივისტებს შორის იყო შვედი გარემოსდამცველი გრეტა ტუნბერგი. ინფორმაციას DW ავრცელებს.

"გემი, სამხედრო მეთვალყურეობის ქვეშ, ისრაელის სანაპიროებზე გაიგზავნა და მის მგზავრებს ზიანი არ მიუღიათ", – ამის შესახებ ისრაელის საგარეო საქმეთა სამინისტრომ ორშაბათს, 9 ივნისს, ღამით, სოციალურ ქსელ X-ში განაცხადა.

Madleen-ის მგზავრები თავიანთ ქვეყნებში დაბრუნდებიან, ხოლო ბორტზე მყოფი ჰუმანიტარული დახმარება ღაზას სექტორში "სათანადო ჰუმანიტარული არხებით" გაიგზავნება, განაცხადა სამინისტრომ. თუმცა, ისრაელის წარმომადგენლებმა არ მიუთითეს, თუ რა ბედი ეწია თავად იახტას, რომელიც საზღვაო ბლოკადის გარღვევას ცდილობდა.

მანამდე ისრაელის თავდაცვის მინისტრმა, ისრაელ კაცმა, ბრძანა, რომ Madleen-ს პალესტინის ტერიტორიის სანაპიროებთან მიახლოების უფლება არ მიეცა.

"ანტისემიტ გრეტას და მის თანმხლებ პირებს, ჰამასის პროპაგანდის რუპორებს, მე ნათლად ვეუბნები: შემობრუნდით, თქვენ ღაზას ვერ მიაღწევთ", — ნათქვამია მინისტრის ადმინისტრაციის მიერ გავრცელებულ განცხადებაში.

გემზე მყოფმა მგზავრებმა დაკავება სპეციალური საშუალებების გამოყენებით თავდასხმად შეაფასეს.

"თავისუფლების ფლოტილიის" კოალიციამ, რომელმაც ორგანიზება გაუწია Madleen-ის ღაზას სექტორში გაგზავნას, Telegram არხზე დაწერა, რომ გემს "საერთაშორისო წყლებში თავს დაესხნენ".

"სამართალდამცავებმა ხომალდი ალყაში მოაქციეს და თეთრი გამაღიზიანებელი ნივთიერება შეასხურეს", — განაცხადეს აქტივისტებმა. "კომუნიკაციები გაითიშა და რადიოში საგანგაშო ხმები ისმის". ამის შემდეგ გემი აიყვანეს. თუმცა, ისრაელის საზღვაო ძალების მიერ გემზე გადაღებულ ვიდეოებში სპეციალური საშუალებების გამოყენების შესახებ არ ჩანს.

შემდგომში "თავისუფლების ფლოტილიამ" დაადასტურა გემის ეკიპაჟის დაკავება და მისი ტვირთის კონფისკაცია. ამავდროულად, აქტივისტმა წარმომადგენელმა ჰუვაიდა არაფმა განაცხადა, რომ ისრაელის ქმედებები არღვევს საერთაშორისო სამართალს, რადგან ისინი ეწინააღმდეგება საერთაშორისო სასამართლოს მიერ ადრე გამოტანილ გადაწყვეტილებას ღაზას სექტორში ჰუმანიტარული დახმარების შეუფერხებლად მიწოდების შესახებ.

თავისუფლების ფლოტილიის მიერ ღაზაში გემის გაგზავნის მეორე მცდელობა იყო.

Madleen სიცილიის კატანიის პორტიდან ღაზას სექტორისკენ 1-ელ ივნისს გაემგზავრა. ბორტზე დაახლოებით ათამდე ადამიანი იმყოფებოდა, მათ შორის ტუნბერგი და ევროპარლამენტარი რიმა ჰასანი. მედიამ აღნიშნა, რომ გემზე ასევე იმყოფებოდნენ აქტივისტები, რომლებიც თანაუგრძნობდნენ რადიკალურ ისლამისტურ დაჯგუფებებს. მათ შორისაა ბრაზილიელი ტიაგო ავილა, რომელიც თებერვალში ლიბანში მოკლული "ჰეზბოლას" ლიდერის, ჰასან ნასრალაჰის დაკრძალვას დაესწრო და ტერორისტ ლიდერზე დადებითად ისაუბრა.

მაისის დასაწყისში, "თავისუფლების ფლოტილამ" უკვე სცადა ევროპიდან ღაზას სექტორში მისიის გაგზავნა გემ "სინდისის" გამოყენებით. თუმცა, მალტის სანაპიროსთან, სადაც ტუნბერგი მისიაში უნდა შეერთებოდა, გემზე ხანძარი გაჩნდა. აქტივისტების თქმით, გემს ღამით დრონები დაესხნენ თავს და ინციდენტში ისრაელი დაადანაშაულეს.

არასამთავრობო ორგანიზაცია "თავისუფლების ფლოტილია" 2010 წელს დაარსდა და მისი ოფიციალური მიზანი ღაზას სექტორში ჰუმანიტარული ტვირთის მიწოდებაა. თუმცა, აქტივისტების წინა მცდელობები, გაერღვიათ ისრაელის საზღვაო ბლოკადა, წარუმატებელი აღმოჩნდა – გემები რეგიონის სანაპიროსთან დააკავეს.