საერთაშორისო გამჭვირვალობა - საქართველოს განცხადებით, ვიდეორგოლი სლოგანით "გაკეთდა თბილისისთვის", რომელიც ტელეკომპანიების, რუსთავი 2-ის და იმედის ეთერში გადის წარმოადგენს თბილისის მერიის რეკლამას.

არასამთავრობო ორგანიზაციის შეფასებით, მისი განთავსება, ერთი მხრივ, არღვევს ქართულ კანონმდებლობას, მეორე მხრივ, კი უარყოფით გავლენას ახდენს წინასაარჩევნო გარემოზე.

TI მოუწოდებს საქართველოს კომუნიკაციების მარეგულირებელ კომისიას - შეისწავლოს ზემოაღნიშნული ფაქტი და მიიღოს შესაბამისი ზომები. ასევე მიმართავს ქალაქ თბილისის მერიას - შეწყვიტოს მსგავსი რეკლამების ტელევიზიებში განთავსება. საკითხით დაინტერესებისკენ მოუწოდებს თავისუფალი და სამართლიანი არჩევნებისთვის უწყებათაშორის კომისიას.

ვიდეორგოლში მოთხრობილია 2014-2017 წლებში თბილისის მერიის მიერ განხორციელებული ინფრასტრუქტურული პროექტების შესახებ. TI-ის შეფასებით, იგი არ ახდენს მოქალაქეთა ინფორმირებას სიახლეების, პროცედურების ან გადაუდებელი გარემოებების შესახებ.

მათივე თქმით, ადგილობრივი თვითმმართველობის ოფიციალური წინასაარჩევნო კამპანიის პროცესში, ასეთი რეკლამების გაშვება ამომრჩევლის მიერ, შესაძლოა, აღქმული იქნეს როგორც მმართველი პარტიის არაპირდაპირი რეკლამა.

TI-ის ცნობით, ვიდეორგოლის განთავსებით შემდეგი მიზეზების გამო ირღვევა ქართული კანონმდებლობა:

  • "მაუწყებლობის შესახებ კანონის 661-ე მუხლის პირველი პუნქტის და კომუნიკაციის ეროვნული კომისიის 15 ივნისის №398/18გადაწყვეტილების თანახმად, ადმინისტრაციული ორგანოს მიერ მაუწყებლის ეთერში რეკლამის განთავსება მის დაფინანსებად ითვლება და აკრძალულია, გარდა გარკვეული გამონაკლისებისა;
  • ადმინისტრაციულ ორგანოებს არ ეკრძალებათ სოციალური რეკლამის განთავსება მაუწყებლებში, თუმცა ვიდეორგოლი არ არის განთავსებული სოციალური რეკლამის სტატუსით. აღსანიშნავია, რომ ის არც აკმაყოფილებს სოციალური რეკლამის მოთხოვნებს".