22 მაისს, თბილისის საქალაქო სასამართლოს დარბაზში კოალიცია ცვლილებებისთვის ერთ-ერთი ლიდერი, ზურაბ გირჩი ჯაფარიძე დააკავეს.

ჯაფარიძეს ქართული ოცნების დროებითი საგამოძიებო კომისიაზე არ გამოცხადებისთვის დაკისრებული გირაოს გადაუხდელობის გამო დააკავეს. პროკურატურამ ჯაფარიძისთვის აღმკვეთი ღონისძიების სახით გირაოს პატიმრობით შეცვლა მოითხოვა. გადაწყვეტილება მოსამართლე ირაკლი შვანგირაძემ მიიღო.

ოპოზიციონერი პოლიტიკოსის დაკავებას საერთაშორისო გამოხმაურება მოჰყვა.

ამერიკელი კონგრესმენი ჯო უილსონი

"ანტიამერიკულმა ქართული ოცნების რეჟიმმა უსამართლოდ დააკავა საკვანძო პოლიტიკური ფიგურა, ზურაბ ჯაფარიძე და ქმნის პრეცედენტს, რომ ყველა ოპოზიციონერი დააპატიმროს. მასიური ესკალაცია შემდგომი ნაბიჯია ძალაუფლების კონსოლიდაციისა და ქვეყნის ჩინეთისა და ირანისთვის გადაცემისთვის," — წერს უილსონი X-ზე.

ევროპარლამენტარი რასა იუკნევიჩიენე

"ქართული ოცნების რეჟიმის სისასტიკე ესკალაციას აგრძელებს. წითელი ხაზები დიდი ხნის წინ იქნა გადაკვეთილი, მაგრამ დღევანდელი ძალიან ნამეტანია.

ზურაბ ჯაფარიძე, ერთ-ერთი ოპოზიციური პარტიის ლიდერი, დააპატიმრეს.

ევროკავშირმა და წევრმა ქვეყნებმა უნდა დაასანქცირონ ბიძინა ივანიშვილი და მისი მეგობრები ახლავე," — წერს იუკნევიჩიენე.

ევროპარლამენტარი პეტრას აუსტრევიჩუსი

"საქართველოში პოლიტიკური დევნის კიდევ ერთი სამარცხვინო მაგალითი! კოალიცია ცვლილებებისთვის ერთ-ერთმა ლიდერმა, ზურაბ ჯაფარიძემ, უარი თქვა ქართული ოცნების რეჟიმის ე.წ. "საპარლამენტო კომიტეტთან" თანამშრომლობაზე და ის დააკავეს და წინასწარ პატიმრობაში მოათავსეს," — წერს აუსტრევიჩუსი.

ევროპარლამენტარი ნატალი ლუაზო

"საქართველო ახალი ბელარუსი ხდება? ჩვენ რას ვაკეთებთ?" — წერს ლუაზო X-ზე.

ბრიტანელი პარლამენტარი ჯეიმს მაკკლირი

"საქართველო აგრძელებს პოლიტიკური რეპრესიების მოლიპულ გზაზე სიარულს.

ოპოზიციონერი პოლიტიკოსი ჯაფარიძე ახლავე უნდა იქნას გათავისუფლებული.

ქართული ოცნების მთავრობამ და მათმა ოლიგარქმა მარიონეტების მმართველმა ივანიშვილმა კიდევ ერთი ხაზი გადაკვეთეს. გაერთიანებული სამეფოს სანქციები უნდა მოჰყვეს," — წერს მაკკლირი X-ზე.

ესტონეთის პარლამენტის საგარეო საქმეთა კომიტეტის თავმჯდომარე მარკო მიხელსონი

"დღეს, საქართველოს დიქტატურამ კიდევ ერთი დანაშაული ჩაიდინა სამართლის, დემოკრატიისა და კანონის უზენაესობის წინააღმდეგ ზურაბ ჯაფარიძის — კოალიცია ცვლილებებისთვის ოპოზიციური პარტიის ლიდერის — უკანონოდ დაკავებით. საქართველოს დამოუკიდებლის დღემდე სულ რამდენიმე დღით ადრე, სასწრაფოდ საჭიროა, რომ დემოკრატიული ერები სიტყვებს გასცდნენ, სანქციები დაუწესონ ივანიშვილის რეჟიმს, და მხარი დაუჭირონ თავისუფლების მოყვარე ქართველ ხალხს მათი მომავლის დაბრუნებაში. თავისუფლება საქართველოში ყველა პოლიტპატიმარს!" — წერს მიხელსონი X-ზე.

ზურაბ ჯაფარიძის საქმეზე გამოძიება სისხლის სამართლის კოდექსის 349-ე მუხლით მიმდინარეობს, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს — აღნიშნული ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების სამ წლამდე ჩამორთმევით ვადით.