ტრამპმა ეროვნული უსაფრთხოების მრჩეველი მაიკ უოლცი თანამდებობიდან გაათავისუფლა და მას გაეროში აშშ-ის ელჩად წარადგენს

დონალდ ტრამპმა დაადასტურა მედიაში გავრცელებული ინფორმაცია, რომ მან აშშ-ის ეროვნული უსაფრთხოების მრჩეველი მაიკ უოლცი თანამდებობიდან გაათავისუფლა. ტრამპმა გამოაცხადა, რომ უოლცი გაეროში აშშ-ის ელჩი გახდება და მის მოვალეობას დროებით სახელმწიფო მდივანი მარკო რუბიო შეასრულებს.

"მოხარული ვარ გაცნობოთ, რომ მაიკ უოლცს წარვადგენ გაეროში შეერთებული შტატების შემდეგ ელჩად", — დაწერა ტრამპმა თავის სოციალურ ქსელ Truth Social-ზე.

"სახელმწიფო მდივანი მარკო რუბიო დროებით ეროვნული უსაფრთხოების მრჩევლის თანამდებობას დაიკავებს, თუმცა სახელმწიფო დეპარტამენტის ძლიერ ლიდერად დარჩება", — დასძინა ტრამპმა.

ამის შემდეგ მაიკ უოლცმა X-ზე დაწერა, რომ მისთვის დიდი პატივი იყო ტრამპის მრჩევლად მუშაობა.

"ჩემთვის დიდი პატივია, რომ პრეზიდენტმა ტრამპმა ნდობა გამომიცხადა და თავის კაბინეტში ეროვნული უსაფრთხოების მრჩევლის თანამდებობაზე დამნიშნა. არ არსებობს უფრო მაღალი მოწოდება, ვიდრე ჩვენი ერის ღირებულებებისა და თავისუფლებების, ასევე თითოეული ამერიკელის უსაფრთხოების მსახურება", — წერს უოლცი.

"პრეზიდენტ ტრამპთან და მის გუნდთან ერთად ჩვენ ვუპასუხებთ დღევანდელი მსოფლიოს ახალ გამოწვევებს და მტკიცედ დავუპირისპირდებით მათ, ვინც ჩვენი ცხოვრების წესის ძირის გამოთხრას ცდილობს. ჩვენი ერი იმსახურებს გაბედულ, ურყევ ხელმძღვანელობას და ის ამას უზრუნველყოფს", — წერს გათავისუფლებული უოლცი.

ხუთშაბათს რამდენიმე ავტორიტეტულმა ამერიკულმა მედიასაშუალებამ დაწერა, რომ უოლცი თანამდებობიდან გაათავისუფლეს.

CBS-ის ინფორმაციით უოლცთან ერთად მისი მოადგილე ალექს ვონგიც დატოვებს თანამდებობას.

Fox News თავის წყაროებზე დაყრდნობით იუწყება, რომ უოლცი, ვონგი და ეროვნული უსაფრთხოების საბჭოს კიდევ რამდენიმე თანამშრომელი უკვე გაათავისუფლეს.

რამდენიმე კვირის წინ, უოლცი მთავარი ფიგურა გახდა სკანდალში, რომელიც Signal ჩატში იემენის ჰუსიტების წინააღმდეგ ამერიკული დარტყმების საიდუმლო გეგმების განხილვას ეხებოდა. სწორედ მან დაამატა ჟურნალ "ატლანტიკის" მთავარი რედაქტორი ჩატში, სადაც ოპერაცია განიხილებოდა.

Der Spiegel-ის ჟურნალისტებმა ტრამპის გუნდის მაღალჩინოსნების პერსონალური მონაცემები ინტერნეტში, ონლაინ იპოვეს

CNN-ის ვებსაიტი წერს, რომ ტრამპმა იმ დროს უოლცს მხარი დაუჭირა, მაგრამ მას შემდეგ, უოლცის გადადგომა მხოლოდ დროის საკითხი გახდა.

CNN-თან საუბრისას ანონიმური წყაროს ცნობით, უოლცს ამ კვირის დასაწყისში უთხრეს, რომ "მისი დრო ეროვნული უსაფრთხოების საბჭოს სათავეში დასრულდა".

Reuters წერს, რომ გადადგომის ერთადერთი მიზეზი "სიგნალის ჩატთან" დაკავშირებული სკანდალი არ ყოფილა.

Reuters-ის წყაროს ცნობით, უოლცი ტრამპისგან განსხვავებით მკაცრი პოლიტიკის მომხრე იყო რიგ საკითხებში და მისი გემოვნებისთვის უფრო რადიკალი "ქორი" იყო.

"უოლცი და ვონგი ქორების რიცხვში იყვნენ ტრამპის უახლოეს მრჩევლებს შორის, მათ შორის ირანთან, ჩინეთთან და ტაივანთან დაკავშირებულ საკითხებში", — განუცხადა თავდაცვის ანალიტიკოსმა ჯენიფერ კავანაგმა Responcible Statecraft-ს.

"უოლცი და ვონგი ხშირად არ ეთანხმებოდნენ ტრამპს, რომელსაც აშკარად სურს ირანთან ომის თავიდან აცილება და, როგორც ჩანს, ნაკლებად სურს ტაივანის დაცვა წინა პრეზიდენტებთან შედარებით", — განაგრძო კავანაგმა.

გარდა ამისა, Reuters -ის წყაროს ცნობით, უოლცი საკმარისად კარგად არ ასრულებდა თავის მთავარ ამოცანას — საგარეო პოლიტიკის სფეროში სხვადასხვა დეპარტამენტის მუშაობის კოორდინაციას.