თბილისის საქალაქო სასამართლოს მოსამართლემ, ნინო გალუსტაშვილმა საპროტესტო აქციებში მონაწილეობისთვის დაკავებული 11 პირი — ანდრო ჭიჭინაძე, ონისე ცხადაძე, გურამის მირცხულავა, ჯანოს არჩაია, ლუკა ჯაბუა, რუსლან სივაკოვი, რევაზ კიკნაძე, გიორგი ტერაშვილი, ვალერი თეთრაშვილი, სერგეი კუხარჩუკი და ირაკლი ქერაშვილი პატიმრობაში დატოვა.

11 პირის საქმე ერთ წარმოებად გაერთიანდა. დაკავებულებს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს. დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.

მოსამართლე გალუსტაშვილმა თქვა, რომ "მართლმსაჯულება მრუდე არ არის და ეჭვიც არ შეგეპაროთ, რომ სასამართლო სამართლიან, კანონიერ და დასაბუთებულ გადაწყვეტილებას გამოიტანს".

"რაც შეეხება აღკვეთის ღონისძიების საკითხს, მოგეხსენებათ, ჩვენ არსებითი განხილვის ეტაპზე ვიმყოფებით, პირველი ინსტანციის სასამართლომ აღკვეთის ღონისძიების შესახებ გადაწყვეტილება გამოიტანა, შესაბამისად, ასე ჩათვალეს საჭიროდ.

[...] როგორც [პროკურორმა] ბრძანა, მოცემულ ეტაპზე უნდა გვქონდეს რაიმე ისეთი მოცემულობა, რაც არ არსებობდა წინა სასამართლო სხდომის ან აღკვეთის ღონისძიების განხილვის ეტაპზე. შესაბამისად, იმ პროცესში, როცა ამ ეტაპზე ვიმყოფებით და მტკიცებულებების ეტაპი არ გაგვივლია, სასამართლო თვლის რომ აღკვეთის ღონისძიების შეცვლის საფუძველი არ არსებობს", — თქვა გალუსტაშვილმა.

24 აპრილს, წინა სხდომაზე, პროკურორმა სასამართლოს წინაშე შესავალი სიტყვა წაიკითხა, ხოლო დღევანდელ სხდომაზე, შესავალი სიტყვით დაცვის მხარის წარმომადგენლები გამოვიდნენ.

ჯგუფურ ძალადობაში მონაწილეობის ბრალდებით დაკავებულმა მსახიობმა, ანდრო ჭიჭინაძემ სასამართლო პროცესზე განაცხადა, რომ მისთვის პროკურატურის ბრალდება გაუგებარია.

ონისე ცხადაძემ კი ოცნების პარლამენტის ვიცე-სპიკერს, ნინო წილოსანს მიმართა, რომელმაც 7 აპრილს, მისი ძმის პოსტი გააზიარა სოციალურ ქსელში.

ონისე ცხადაძემ თქვა, რომ "თუ ვინმეს ჰგონია, რომ ციხე ჩემთვის კომფორტია, მაშინ ნინო წილოსანს ვუსურვებ იგივე სიტუაციას 4-დან 6 წლამდე".

"ნინო წილოსანს გაუზიარებია ჩემი ძმის პოსტი, თურმე კარგი პირობები მქონია ციხეში — ტელევიზორი მქონია. ცალსახად კარგია, რომ ის რაც ადრე ხდებოდა, ახლა არ ხდება. მაგრამ, თუ ვინმეს ჰგონია, რომ ციხე ჩემთვის კომფორტია, მაშინ ნინო წილოსანს ვუსურვებ იგივე სიტუაციას 4-დან 6 წლამდე. თან მოტივები თქვენ უფრო მეტი გექნებათ ქალბატონო ნინო", — თქვა სინდისის პატიმარმა, ონისე ცხადაძე დღევანდელ სასამართლო პროცესზე.