სამხრეთ კორეა და იაპონია აცხადებენ, რომ ჩრდილოეთ კორეამ იაპონიის ჩრდილოეთ ნაწილისკენ კიდევ ერთი ბალისტიკური რაკეტა გაუშვა, წერს BBC.

მათი ინფორმაციით, რაკეტამ დაახლოებით, 3700 კმ იფრინა. მან იაპონიის კუნძულ ჰოკაიდოს გადაუფრინა და წყნარ ოკეანეში ჩავარდა. მანამდე, 29 აგვისტოს გაშვებულმა ბალისტიკურმა რაკეტამ კი, უფრო ნაკლები - 2700 კმ დაფარა.

იაპონიის პრემიერ-მინისტრმა შ ინძო აბემ განაცხადა, რომ მისი ქვეყანა არასდროს მოითმენს მსგავს "პროვოკაციულ ქმედებებს". ჩრდილოეთ კორეის ქმედების საპასუხოდ კი, სამხრეთ კორეამ იაპონიის ზღვაში ბალისტიკური რაკეტა გაუშვა.

რამდენიმე დღის წინ გაერომ, ბირთვული იარაღის გამოცდის გამო, ჩრდილოეთ კორეის წინააღმდეგ ახალი სანქციები დაამტკიცა. 3 სექტემბერს ფხენიანმა წყალბადის ბომბი გამოსცადა. როგორც ადგილობრივი მედია იუწყება, გამოცდამ წარმატებით ჩაიარა. 2006 წლის შემდეგ ეს იყო ჩრდილოეთ კორეის ბირთვული იარაღის რიგით მეექვსე გამოცდა.