ჩრდილოეთ კორეამ რაკეტა გაისროლა, რომელმაც იაპონიის ჩრდილოეთ კუნძულ ჰოკაიდოს გადაუფრინა და ზღვაში აფეთქდა, აცხადებს იაპონიის მთავრობა.

როგორც BBC წერს, იაპონიის მთავრობის მხრიდან არანაირი მცდელობა არ ყოფილა, რომ ჩამოეგდოთ რაკეტა, რომელიც ადგილობრივი დროით 29 აგვისტოს, დილით ადრე გაუშვეს. რაკეტის გაშვების გამო იაპონიაში უსაფრთხოების განგაში ამოქმედდა და მოსახლეობას სარდაფებისთვის თავის შეფარება ურჩიეს. ეს არის პირველი შემთხვევა, როცა ჩრდილოეთ კორეის ბალისტიკურმა რაკეტამ იაპონიას გადაუფრინა. ჩრდილოეთ კორეულმა რაკეტებმა იაპონიის ტერიტორიებს ჯერ კიდევ 1998 და 2009 წლებში მიაღწიეს, თუმცა მაშინ ითქვა, რომ ეს არა სამხედრო დანიშნულების, არამედ სატელიტის გასაშვებად გამიზნული რაკეტები იყო.

ადგილობრივი მედიის თანახმად, სანამ რაკეტა ზღვაში ჩაეშვა, სამ ნაწილად დაიშალა.

შაბათს ჩრდილოეთ კორეამ აღმოსავლეთ სანაპიროსკენ ასევე ისროლა სამი მოკლე დისტანციის რაკეტა.

იაპონიის პრემიერ-მინისტრმა შინზო აბემ ინციდენტიდან მალევე განაცხადა, რომ მთავრობა ყველაფერს აკეთებდა, რომ ადამიანების სიცოცხლე გადაერჩინა.

იაპონიის მთავრობის კაბინეტის მდივანმა იოშიჰიდე სუგამ ბოლო ტესტი აღწერა, როგორც "უპრეცედენტო, მძიმე საფრთხე". მან განაცხადა, რომ იაპონია საპასუხოდ შესაბამის ნაბიჯებს გადადგამს.

როგორც ანალიტიკოსები აცხადებენ, ჩრდილოეთ კორეისგან მსგავსი პროვოკაციული ნაბიჯი მოსალოდნელი იყო, რადგან რეგიონში ამ დროისათვის აშშ-სამხრეთ კორეისა და აშშ-იაპონიის ერთობლივი წვრთნები მიმდინარეობს. როგორც წესი, ჩრდილოეთ კორეა მსგავს აქტივობებს უპასუხოდ არ ტოვებს.