როგორც საქართველოს პარლამენტის განათლებისა და კულტურის კომიტეტი წერს, კომიტეტის თავმჯდომარე მარიამ ჯაში კავკასიაში დევიდ ლინჩის ფონდის ხელმძღვანელს გიგა აგლაძეს და მის გუნდს შეხვდა. პირველი სამუშაო შეხვედრის მთავარი თემა ეხებოდა ამერიკელი კონორეჟისორის დევიდ ლინჩის ვიზიტს საქართველოში, რომელიც 18-21 ნოემბერს იგეგმება.

"ეს არის საქართველოსთვის უდიდესი შესაძლებლობა, რომ ვუმასპინძლოთ მსოფლიოში ცნობილ რეჟისორს და ვისაუბროთ მის ფონდთან სამომავლო თანამშრომლობის ინიციატივებზე", - თქვა შეხვედრის შემდეგ მარიამ ჯაშმა.

როგორც კომიტეტის თავმჯდომარემ აღნიშნა, შეხვედრაზე ისაუბრეს ნოემბერში დევიდ ლინჩის ვიზიტის დაგეგმარების თაობაზე. მისი თქმით, საქმე ეხება მაღალი დონის შეხვედრების გამართვას, სადაც განიხილება რამდენიმე მნიშვნელოვანი საკითხი. პირველი ინიციატივა ეხება დევის ლინჩის საერთაშორისო კინემატოგრაფიული უნივერსიტეტის გახსნას საქართველოში, ასევე იგეგმება საერთაშორისო კინოფესტივალის პროექტთან დაკავშირებით დისკუსია, ასევე საუბარია ფართომასშტაბიან სოციალურ პროექტზე - ავტოსაგზაო შემთხვევების შედეგად დაზარალებული პირებისთვის სარეაბილიტაციო პროგრამებზე.

მარიამ ჯაშის თქმით, დევიდ ლინჩის ფონდის მიერ გაჟღერებული ყველა ინიციატივა თანხვედრაშია საქართველოს პარლამენტისა და მთავრობის მიერ გაცხადებულ პრიორიტეტებთან.

კავკასიაში დევიდ ლინჩის ფონდის ხელმძღვანელის გიგა აგლაძის განცხადებით კი უკვე გადაწყვეტილია, რომ რეჟისორი თბილისს ნოემბერში ესტუმრება და ფართო აუდიტორიასთან გამართავს შეხვედრებს, გაიმართება მისი ფილმების ჩვენებაც.

"ის პროექტები, რისი გაკეთებაც იგეგმება ქვეყნისთვის, არის ძალიან მნიშვნელოვანი, მათ შორის არის დევიდ ლინჩის სახელობის კინემატოგრაფიის ინსტიტუტის და ა-კლასის კინოფესტივალის დაარსება. ჩვენი ქვეყნისთვის უდავოდ მნიშვნელოვანია, კინემატოგრაფიის ენაზე რომ ვთქვათ, ასეთი ახლო ურთიერთობა ჰოლივუდთან და დიდ რეჟისორებთან, ვინაიდან დევიდ ლინჩის ფონდი 250 ცნობილ სახეს აერთიანებს. სულ მალე საქართველოში ჰოლივუდის ყველა ის ვარსკვლავი ჩამოვა, რომელთა ნახვაც აქამდე მხოლოდ კინოეკრანზე შეგვეძლო", - თქვა გიგა აგლაძემ.

შეგახსენებთ, რომ ლინჩის ვიზიტი საქართველოში ჯერ კიდევ ზაფხულში იგეგმებოდა, თუმცა გაურკვეველი მიზეზების გამო ის გადაიდო.