"ივანიშვილის მოედანზე იყო გადასული გახარია და იქ აბურთავებდა წულუკიანი. ჩემთვის ეს სასიამოვნო სანახავი არ ყოფილა და ვთვლი, რომ ამით დავზიანდით", — ამის შესახებ "ფედერალისტების" ლიდერმა, თამარ ჩერგოლეიშვილმა "ტვ ფორმულას" ეთერში განაცხადა.

ჩერგოლეიშვილმა განაცხადა, რომ გიორგი გახარიას პარლამენტის საგამოძიებო კომისიაზე მისვლას უარყოფითად აფასებს.

"თვითონ ფაქტს, უარყოფითად ვაფასებ, პირველ რიგში, პრინციპულად, იმიტომ რომ ერთია, რომ შენ იძახი არალეგიტიმურია პარლამენტი და მეორე ამ არალეგიტიმური პარლამენტის წიაღში შექმნილ რაღაც ცირკს ელაპარაკები. მეორე — გარდა უშუალო პრინციპული წინააღმდეგობისა, რომელიც ობიექტურია, თანმიმდევრულობა მნიშვნელოვანია, როცა ასეთ მონსტრს ებრძვი და ხალხი გყავს გადმოსაბირებელი, თანმიმდევრული უნდა იყო.

შინაარსობრივად, მთელი დღე, ნაცვლად იმისა, რომ 14 აპრილის მნიშვნელობაზე გვესაუბრა და იმაზე, რას გვაკარგვინებს ივანიშვილი, თუ ადრე სახელმწიფოებრივ ენას ვკარგავდით, ახლა საერთოდ სახელმწიფოებრივ სუვერენიტეტს ვკარგავთ, ვიდექით და ივანიშვილის მოედანზე გადასულები ვისმენდით თავის მართლებას იმაზე, როგორი ამრევია ალტერნატივა და არეულობის სცენარები განიხილებოდა. ივანიშვილის მოედანზე იყო გადასული გახარია და იქ აბურთავებდა წულუკიანი. ჩემთვის ეს სასიამოვნო სანახავი არ ყოფილა და ვთვლი, რომ ამით დავზიანდით," — თქვა ჩერგოლეიშვილმა.

შეგახსენებთ, რომ 14 აპრილს 12:00 საათზე ენმ-ს ხელისუფლების საქმიანობის შემსწავლელი დროებითი საგამოძიებო კომისიის სხდომაზე პარტია გახარია საქართველოსთვის ლიდერი, გიორგი გახარია დაიბარეს.

13 აპრილის საღამოს, პარტიის პრესსამსახურმა გაავრცელა ინფორმაცია, რომ ზუსტად ამ დროს, 14 აპრილს, 12:00 საათზე გიორგი გახარია ბრიფინგს გამართავდა. დილით კი ამავე პრესსამსახურმა დაგვიდასტურა, რომ გიორგი გახარია კომისიაზე წარდგენას აპირებდა.

რატომ მოვიდა გახარია საგამოძიებო კომისიის სხდომაზე? რას ედავება მას წულუკიანის კომისია? ვინ გასცა 20 ივნისს რეზინის ტყვიების გამოყენების ნებართვა? — ეს არის ის ძირითადი კითხვები რაზეც საგამოძიებო კომისიის სხდომაზე დღეს მსჯელობდნენ. სხდომა თითქმის 6 საათს გაგრძელდა.

სრულად რაზე ისაუბრეს საგამოძიებო კომისიის სხდომაზე, წაიკითხეთ აქ:

რატომ მივიდა გახარია საგამოძიებო კომისიაზე, ვინ გასცა 20 ივნისს რეზინის ტყვიების გამოყენების ნებართვა? — მთავარი 6-საათიანი სხდომიდან