"არც კოჰაბიტაცია გვინდოდა, არც ლომჯარიას დანიშვნა და ზურაბიშვილის გაპრეზიდენტება, არც გიორგი გახარიას გაპრემიერება, უბრალოდ, მაგდენი პოლიტიკური ჯანი არ გვქონდა — საზოგადოება ჩვენს მდგომარეობაში უნდა შევიდეს!", — ამის შესახებ პლენარულ სხდომაზე, ოცნების დეპუტატმა, ლევან მაჭავარიანმა გააკეთა განმარტება, რატომ დააწინაურეს 20 ივნისის შემდეგ გიორგი გახარია.

ამას გარდა, მან ახალგაზრდებს მიმართა, რომ პარლამენტში შექმნილი საგამოძიებო კომისიის მუშაობას თვალყური ადევნონ და მიხვდებიან "რა არის ტოტალიტარული რეჟიმი".

"ოპოზიციონერებმა და მათმა ტელევიზიებმა ყური მიაჩვიეს, თითქოს რაღაც რეჟიმის პირობებში უწევთ ცხოვრება. უყურეთ რა ხდება და რას ჰყვებიან დაზარალებული ოჯახები. ახალგაზრდებო! ამის მერე კარგად მიხვდებით, თუ რა არის ტოტალიტარული რეჟიმი და რეალურად გაავლებთ პარალელს, თუ როგორ დემოკრატიულ ქვეყანაში ცხოვრობთ თქვენ დღეს. გთხოვთ, შეგნებით იაზროვნოთ და რაღაც ტრენდებს არ აჰყვეთ.

კოალიცია არ არსებობს. არჩევნებში 51% ამ 4 რადიკალურ პარტიას რომ აეღო, თქვენ ხელისუფლებაში მოგყავდათ მოძალადეები, მკვლელები, გამაუპატიურებლები, რეკეტიორები, აფერისტები — "კოლექტიური ნაციონალური მოძრაობა", რევანშისტული ზრახვებით. როცა საარჩევნო უბნებზე მიხვალთ, კარგად გაიაზრეთ, რა მოჰყვება თქვენს მიერ გადადგმულ ნაბიჯს და თქვენს მიერ მიცემულ ხმას.

გამოდით შემდეგი პრინციპიდან, რომ ხმა მისცეთ ქვეყნის დამოუკიდებლობას, სუვერენიტეტს და მშვიდობას! ხმა უნდა მისცეთ იდენტობის გაძლიერებას! ხმა უნდა მისცეთ მამულს, ენას და სარწმუნოებას", — განაცხადა ლევან მაჭავარიანმა პარლამენტის პლენარულ სხდომაზე.