აშშ-ის პრეზიდენტის, დონალდ ტრამპის ადმინისტრაცია აშშ-ის სახელმწიფო დეპარტამენტის ბიუჯეტის 50%-ით შემცირებას გეგმავს. ამის შესახებ ნათქვამია The New York Times-ის მიერ მოპოვებულ მემორანდუმში.

გამოცემა წერს, რომ გაეროს და ნატოს დაფინანსება შესაძლოა მნიშვნელოვნად შემცირდეს, შეერთებულმა შტატებმა ასევე შეიძლება მთლიანად შეწყვიტოს საერთაშორისო სამშვიდობო ოპერაციების ფინანსური მხარდაჭერა და სახელმწიფო დეპარტამენტის მიერ დაფინანსებული ყველა კულტურული გაცვლითი და საგანმანათლებლო პროგრამა. New York Times-ის ცნობით, ფინანსური დახმარების შეზღუდვები შესაძლოა შეეხოს ჰუმანიტარული დახმარებისა და ჯანდაცვასთან დაკავშირებულ პროექტებს, მათ შორის იმ თანხებს, რომლებიც გამოყოფილია მსოფლიოს უღარიბესი ქვეყნებისთვის მედიკამენტებისა და ვაქცინების შესაძენად. მათვე ცნობით, ამ სცენარით სახელმწიფო დეპარტამენტის ბიუჯეტი შესაძლოა წელს 54 მილიარდი დოლარიდან 28 მილიარდ დოლარამდე შემცირდეს.

გამოცემის წყაროები სახელმწიფო დეპარტამენტში განმარტავენ, რომ ეს გეგმები შემუშავდა თეთრი სახლის მოთხოვნების შესაბამისად, რომ ყველა დეპარტამენტმა და სამთავრობო უწყებამ წარმოადგინოს ბიუჯეტის მნიშვნელოვანი შემცირების გეგმები. ტრამპის ადმინისტრაცია მალე კონგრესს წარუდგენს მომავალი წლის ფედერალური ბიუჯეტის საკუთარ ვერსიას, რომელიც, სავარაუდოდ, მთავრობის ხარჯების მნიშვნელოვან შემცირებას მოიცავს.

თეთრი სახლის ბიუჯეტის მოთხოვნა კონგრესმა უნდა დაამტკიცოს, სადაც ბევრი კანონმდებელი ეწინააღმდეგება საერთაშორისო პროგრამების დაფინანსების მკვეთრად შემცირების მცდელობებს. რამდენიმე დემოკრატმა სენატორმა უკვე გააკრიტიკა წინადადებები.

"რატომ ვაპირებთ ნატოს დაფინანსების შემცირებას, როდესაც ევროპაში ომი მიმდინარეობს და კონტინენტზე უსაფრთხოების საფრთხე იზრდება?" — ნათქვამია სენატის საგარეო ურთიერთობათა კომიტეტის ერთ-ერთი ლიდერის, დემოკრატი ჯინ შაჰინის განცხადებაში.

ამავდროულად, დონალდ ტრამპის ადმინისტრაცია აპირებს 4 მილიარდი დოლარის მოთხოვნას სახელმწიფო დეპარტამენტში სპეციალური დანაყოფის შესაქმნელად, რომელიც საგანგებო საერთაშორისო ჰუმანიტარული დახმარების გაწევით იქნება დავალებული.