საქართველოს ფინანსთა სამინისტროს საგამოძიებო სამსახურის თანამშრომლებმა, ყალბი ფულის გასაღების ბრალდებით, თურქეთის მოქალაქე დააკავეს. უწყების პრესსამსახურის ინფორმაციით, საგამოძიებო მოქმედებების შედეგად ამოღებულია 30 ცალი 100-დოლარიანი ყალბი კუპიურა.

"გამოძიებით დადგინდა, რომ აღნიშნულმა პირმა, ქალაქ ბათუმში, ფიზიკურ პირზე ყალბი ფულის - სამი ათასი აშშ დოლარის გასაღება მოახდინა", - აღნიშნავენ უწყებაში.

საქმეზე გამოძიება საქართველოს სისხლის სამართლის კოდექსის 212-ე მუხლის პირველი ნაწილით მიმდინარეობს. ამ მუხლით ყალბი საბანკო ვალუტის გასაღება ისჯება თავისუფლების აღკვეთით ვადით ოთხიდან შვიდ წლამდე.