ქართული ოცნების წარმომადგენლები, მათ შორის პარტიის აღმასრულებელი მდივანი მამუკა მდინარაძე და ოცნების პრემიერი, ირაკლი კობახიძე 9 აპრილი მემორიალის მაგივრად, სადაც სინდისის პატიმრების მშობლებმა ღამე გაათენეს — სამებაში მივიდნენ.

მდინარაძეს განცხადებით, 9 აპრილის მემორიალთან მყოფი მოქალაქეები "ბურჭულაძე-როდიონოვები, რუსი გენერლის მსგავსად, ცდილობენ რუსთაველის გამზირის "ოკუპაციას".

"რაც შეეხება დღევანდელ დამოკიდებულებას, ზოგი შეიძლება გულწრფელად ფიქრობს, რომ კარგ საქმეს აკეთებს და შეცდომაში იყოს შეყვანილი. თუმცა, ასეთი ცოტანი იქნებიან. ბევრმა იქ მდგომმა ძალიან კარგად იცის, რომ თავის დროზე როდიონოვი ცდილობდა რუსთაველის გამზირის ოკუპაციას და ახლა ცდილობენ ბურჭულაძე-როდიონოვები" — განაცხადა მდინარაძემ.

ოცნების აღმასრულებელმა მდივანმა ასევე დასძინა, რომ პროვოკაციის აყოლას არ აპირებდნენ და სწორედ ამიტომ, 9 აპრილის მემორიალთან არ მივიდნენ.

"დღევანდელი დღე, რომელიც ყველასთვის ასოცირდება ერთიანობასთან, მშვიდობასთან, ურთიერთსიყვარულთან, ქართველი ხალხის ერთობასთან, ქართულ ერთობასთან, ამ დღეს ცდილობენ, რომ დაპირისპირება შემოიტანონ და ძალადობა შემოიტანონ.

ჩვენ ასეთ პროვოკაციებს, ბუნებრივია, არ ავყევით, დღეს უნდოდათ რაღაც სურათის დადგმა და ძალიან ცუდი იქნებოდა, როგორ წარმოგიდგენიათ, იქ ვიღაცები პოლიციამ უნდა, უკაცრავად ამ გამონათქვამისთვის, გაათრიოს, მერე მიხვიდე და ტიტები დააწყო. ამ პროვოკაციაზე წამოგება უნდოდათ, არ ავყევით, ვარჩიეთ, რომ ამოვსულიყავით სამებაში პარაკლისზე. მოგვეხსენიებინა გარდაცვლილი გმირების სულები", — თქვა "ოცნების" აღმასრულებელმა მდივანმა, მამუკა მდინარაძემ.

შეგახსენებთ, 9 აპრილის ღამე სინდისი პატიმრების მშობლებმა და მოქალაქეებმა პარლამენტის წინ, 9 აპრილის დაღუპულთა მემორიალის წინ გაათენეს.

ასევე იხილეთ: