სინდისის პატიმრების მშობლებმა და მოქალაქეებმა ღამე 9 აპრილის მემორიალთან გათენეს. ამ წუთებში მათ 9 აპრილის მემორიალთან ცოცხალი ჯაჭვი აქვთ შეკრული, რომ ოცნების ხელისუფლების წარმომადგენლებს იქ მისვლის უფლება არ მისცენ.

მემორიალთან პირველი აშშ-ს ელჩი, რობინ დანიგანი მივიდა და 9 აპრილის მემორიალი ყვავილების გვირგვინით შეამკო. ცოტა ხნის წინ, მემორიალთან მივიდნენ ასევე საქართველოში პოლონეთის საელჩოს წარმომადგენლები.

რუსთაველის გამზირზე და პარლამენტის მიმდებარე ქუჩებზე პოლიციაა მობილიზებული.

ჯერჯერობით ქართული ოცნების წარმომადგენლები მემორიალთან არ გამოჩენილან.

ღამისთევის აქცია რუსთაველის გამზირზე, 8 აპრილს 22:00 საათზე დაიწყო.

9 აპრილის მემორიალთან მოქალაქეებმა ფიცი დადეს — ფიცი პაატა ბურჭულაძემ წაიკითხა.

"დღეს, 9 აპრილს, რუსთაველის გამზირზე, სადაც 36 წლის წინ ჩვენი გმირები ლოცვით და სიმღერით იბრძოდნენ საბჭოთა ჯარების პირისპირ, საქართველოს თავისუფლებისთვის, მათი წამებული სულების წინაშე, რომლებიც დაგვცქერიან, დღეს ჩვენ - ვფიცავთ, დავიცავთ მათ მონაპოვარს, საქართველოს დამოუკიდებლობას, დავიცავთ თითოეულ მებრძოლს, სინდისის პატიმრებს, არ მივატოვებთ სიმართლისთვის დევნილებს, სიტყვით და საქმით, სიყვარულით ხელს გავუწვდით მათ და მათ ოჯახებს, მხარში ამოვუდგებით ერთმანეთს, ვიბრძოლებთ ბოლომდე ამ ქვეყნისა და ხალხის თავისუფლებისთვის. დაე, ღმერთი იყოს ჩვენი შემწე ამ დიდ ბრძოლაში" —ნათქვამია ფიცში.