ლვოვის სასამართლო საქართველოს ექს-პრეზიდენტისა და ოდესის ყოფილი გუბერნატორის მიხეილ სააკაშვილის მიერ უკრაინის საზღვრის კვეთას 18 სექტემბერს განიხილავს, წერს Starana.ua. ამის შესახებ ინფორმაცია უკრაინის სახელმწიფო საზღვრის სამსახურის პრესსპიკერმა, ვლადიმერ შერემეტევმა გაავრცელა.

სასამართლო პროცესი 15:00 საათზეა ჩანიშნული. შერემეტევის თქმით, სააკაშვილი სასამართლოში საზღვრის უკანონო კვეთის შესახებ გაფორმებული პროტოკოლის განხილვაზე უნდა მივიდეს.

მიხეილ სააკაშვილის მიერ ხელმოწერილი პროტოკოლი

ფოტო: Unian

10 სექტემბერს, საქართველოს ექს-პრეზიდენტმა და ოდესის ყოფილმა გუბერნატორმა მიხეილ სააკაშვილმა პოლონეთი-უკრაინის საზღვარი გადაკვეთა. ამ ფაქტზე ლვოვის ოლქის პოლიციამ გამოძიება უკვე დაიწყო.

სამართალდამცავების წინააღმდეგობის მიუხედავად, შეგინის სასაზღვრო პუნქტთან, უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს, საკონტროლო-გამშვებ პუნქტში შეიჭრნენ და სააკაშვილი უკრაინის ტერიტორიაზე გადაიყვანეს.

როგორც სააკაშვილი ამბობს, მან საზღვარი გადმოკვეთა ლეგალური პასპორტით, რომელიც ავტობუსში დარჩა და ის ჩხრეკის დროს სამართალდამცავებმა "მოიპარეს".

მიხეილ სააკაშვილს უკრაინის მოქალაქეობა პრეზიდენტ პოროშენკოს გადაწყვეტილებით 26 ივლისს, ამერიკაში ვიზიტისას ჩამოერთვა. მიუხედავად ამისა, მას შემდეგ სააკაშვილი პოლონეთში, ლიტვასა და ბრიუსელში იმყოფებოდა. როგორც უკრაინის იუსტიციის მინისტრი იუწყება, საქართველომ უკვე მესამედ მიმართა უკრაინულ მხარეს სააკაშვილის ექსტრადიციის მოთხოვნით.