საქართველოს ექს-პრეზიდენტმა და ოდესის ოლქის ყოფილმა გუბერნატორმა მიხეილ სააკაშვილმა ლვოვში ბრიფინგზე განაცხადა, რომ უკრაინის სასაზღვრო პოლიციამ უარი თქვა პასპორტის შემოწმებაზე, ასევე არ ნახეს სახელმწიფო საიმიგრაციო სამსახურის განცხადება:

"პოლონეთის საზღვარი უკრაინის ლეგალური პასპორტით გადმოვკვეთე. მივედი უკრაინელებთან, მივეცი პასპორტი, რათა მიეღოთ ან უარი ეთქვათ. მათ მითხრეს, რომ პასპორტს არ მიიღებდნენ. მაშინ ვუპასუხე, მაშინ მიიღეთ განცხადება დაცვაზე. არ მიიღეს."

მისივე თქმით, როდესაც მან უკრაინის საზღვარი გადმოლახა, მას ავტობუსში დარჩა პასპორტი, რომელიც შემდეგ პოლიციამ მოიპარა:

"როდესაც ხალხმა უკრაინაში შემიყვანა, პასპორტი ავტობუსში დავტოვე. მოვიდა პოლიცია, გაჩხრიკა ავტობუსი და მოიპარა პასპორტი. სად არის არ ვიცი. დღეს დილით ჩემმა ადვოკატმა სახელმწიფო საიმიგრაციო სამსახურში მოიტანა განცხადება უკრაინის ხელისუფლებისგან დაცვის შესახებ. ანუ, ახლა მე უკრაინაში ლეგალურად ვიმყოფები."

გუშინ, 10 სექტემბერს, საქართველოს ექს-პრეზიდენტმა და ოდესის ყოფილმა გუბერნატორმა მიხეილ სააკაშვილმა პოლონეთი-უკრაინის საზღვარი გადალახა. ამ ფაქტზე ლვოვის ოლქის პოლიციამ გამოძიება უკვე დაიწყო.

სამართალდამცავების წინააღმდეგობის მიუხედავად, შეგინის სასაზღვრო პუნქტთან, უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს, საკონტროლო-გამშვებ პუნქტში შეიჭრნენ და სააკაშვილი უკრაინის ტერიტორიაზე გადაიყვანეს.

მიხეილ სააკაშვილს უკრაინის მოქალაქეობა პრეზიდენტ პოროშენკოს გადაწყვეტილებით 26 ივლისს, ამერიკაში ვიზიტისას ჩამოერთვა. მიუხედავად ამისა, მას შემდეგ სააკაშვილი პოლონეთში, ლიტვასა და ბრიუსელში იმყოფებოდა. როგორც უკრაინის იუსტიციის მინისტრი იუწყება, საქართველომ უკვე მესამედ მიმართა უკრაინულ მხარეს სააკაშვილის ექსტრადიციის მოთხოვნით.