ლვოვის ოლქის პოლიციამ სააკაშვილის მიერ უკრაინის საზღვრის გადაკვეთის ფაქტზე გამოძიება დაიწყო, წერს Unian. უკრაინის სახელმწიფო საზღვრის დაცვის სამსახურის თქმით, შეიძლება დამატებითი გარემოებები დაემატოს, რის გამოც შესაძლოა საქმე გადაკვალიფიცირდეს:

"სამხედრო პროკურატურის გამომძიებლები დაადგენენ რა მოხდა, შეაგროვებენ მტკიცებულებებს და საქმეს მუხლების მიხედვით დააკვალიფიცირებენ. ესაა ადამიანების ჯგუფის მიერ საზღვრის უკანონო გადაკვეთა, საზღვრის უკანონოდ გადაკვეთის ორგანიზება, მოვალეობის შესრულების დროს სამხედრო მოსამსახურეების სხეულის დაზიანება. შესაძლოა სხვა მუხლებით გაჩნდეს."

გუშინ, 10 სექტემბერს საქართველოს ექს-პრეზიდენტმა და ოდესის ყოფილმა გუბერნატორმა მიხეილ სააკაშვილმა პოლონეთი-უკრაინის საზღვარი გადაკვეთა.

სამართალდამცავების წინააღმდეგობის მიუხედავად, შეგინის სასაზღვრო პუნქტთან, უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს, საკონტროლო-გამშვებ პუნქტზე შეიჭრნენ და სააკაშვილი უკრაინის ტერიტორიაზე გადაიყვანეს.

მიხეილ სააკაშვილს უკრაინის მოქალაქეობა პრეზიდენტ პოროშენკოს გადაწყვეტილებით 26 ივლისს, ამერიკაში ვიზიტისას ჩამოერთვა. მიუხედავად ამისა, მას შემდეგ სააკაშვილი პოლონეთში, ლიტვაში და ბრიუსელში იმყოფებოდა. როგორც უკრაინის იუსტიციის მინისტრი იუწყება, საქართველომ უკვე მესამედ მიმართა უკრაინულ მხარეს სააკაშვილის ექსტრადიციის მოთხოვნით.