მზია ამაღლობელის საქმის სანქცირებულმა მოსამართლემ, ნინო სახელაშვილმა დაადასტურა, რომ სისხლის სამართლის სპეციალიზაციით არ უსწავლია არც მაგისტრატურაში და არც სისხლის სამართლის სპეციალიზაციით მოსამართლეთა საკვალიფიკაციო გამოცდა აქვს ჩაბარებული.

"ნამდვილად გიდასტურებთ, სისხლის სამართლის სპეციალიზაციით არ მაქვს გამოცდა ჩაბარებული, თუმცა ვერ მიუთითებთ ვერც ერთ კანონის ნორმას, სადაც მსგავსი ჩანაწერი ან მოთხოვნა არსებობს", — თქვა ნინო სახელაშვილმა სასამართლო სხდომაზე, სადაც ამაღლობელის ადვოკატები მის აცილებას ითხოვდნენ.

საბოლოოდ, მოსამართლემ ადვოკატების აცილების შუამდგომლობა არ გაიზიარა.

ადვოკატების განცხადებით, მოსამართლის აცილების საფუძველია ის, რომ ნინო სახელაშვილს არ აქვს შესაბამისი იურიდიული განათლება, აკრძალული აქვს ევროკავშირის რამდენიმე ქვეყანაში შესვლა და „ჩართულია მზია ამაღლობელის უკანონო დევნაში”.

"სასამართლოს მიაჩნია, რომ ყველა ის საკითხი და არგუმენტი, რაზეც დაცვის მხარემ ყურადღება გაამახვილა არ გამომდინარეობს მოქმედი კანონმდებლობიდან გამომდინარე, შესაბამისად, დაცვის მხარის შუამდგომლობა აცილებასთან დაკავშირებით არ უნდა დაკმაყოფილდეს. აღნიშნული განჩინება ცალკე არ საჩივრდება, შეგიძლიათ გაასაჩივროთ შემაჯამებელ გადაწყვეტილებასთან ერთად", — განაცხადა მოსამართლე ნინო სახელაშვილმა.

ბათუმის საქალაქო სასამართლოში "ბათუმელების" და "ნეტგაზეთის" დამფუძნებლის და დირექტორის, მზია ამაღლობელის სისხლის სამართლის საქმეზე სასამართლო პროცესი გადაიდო. შემდეგი სხდომა 31 მარტს, 31:00 საათზე გაიმართება.