ახალი მეტროსადგურის, უნივერსიტეტის, გახსნასთან ერთად, თბილისის მეტროში 8 განსხვავებული ფორმისა და დიზაინის, განახლებული ვაგონი იმოძრავებს. ვაგონებში არსებული წითელი ტყავის სკამები ლურჯით შეიცვალა.

მოქალაქეთა ნაწილმა აღნიშნული ცვლილება ქართული ოცნების პარტიულ ლურჯ ფერს დაუკავშირა. სატრანსპორტო კომპანიაში უარყოფენ, რომ ახალი სკამებისთვის ლურჯი ფერის შერჩევა რომელიმე პარტიის ფერს უკავშირდება და ის უბრალოდ, ახალი დიზაინის ფარგლებში შეირჩა.

"ახალი დიზაინის მატარებელია და ასეთი გადაწყვეტილება იქნება მიღებული. ნეიტრალური ტონი შეირჩა. სხვა განახლებული ვაგონებიც იქნება ამ სტილის", - განუცხადეს On.ge-ს სატრანსპორტო კომპანიაში.

ფოტო: თბილისის მერია

თბილისის მერიის ცნობით, მოდერნიზაციის ფარგლებში, შეიცვალა მემანქანის კაბინის ფორმა და გაიზარდა მისი მოცულობა, სალონში ძველი სანათები ახალი, დიოდური სანათებით შეიცვალა, ვაგონებში დამონტაჟდა შიდა დაკვირვებისა და გარე, ბაქნის საკონტროლო კამერები. ვაგონებში განთავსდა სპეციალური მონიტორები და მობილური მოწყობილობების დასატენი USB შესაერთებლები. ასევე შეიცვალა ვაგონების გარე და შიდა დიზაინი და ფერები.