11 მარტის საღამოს, ზუგდიდის მუნიციპალიტეტის სოფელ დარჩელში, პოლიციელი 24 წლის კაცს ავტომანქანით დაეჯახა. დაშავებულის მდგომარეობა კრიტიკულად მძიმეა. ინფორმაციას ბათუმელები ავრცელებს.

დაშავებულის ნათესავმა, მაია კალანდიამ ბათუმელებთან საუბარში განაცხადა, რომ პოლიციელი კობა კვინტაძე ნასვამ მდგომარეობაში მართავდა ავტომობილს. ფაქტი მას სხვა მაღალჩინოსანმა პოლიციელებმაც დაუდასტურეს. დაზარალებულს მანქანა ტროტუარზე შეეჯახა, როდესაც ნასვამი პოლიციელი, სხვა ავტომანქანისგან შეჯახების თავიდან აცილების მიზნით, ტროტუარზე გადავიდა.

მაია კალანდიას განაცხადებით, დაზარალებულის ჯანმრთელობის მდგომარეობა უმძიმესია, ის მეოთხე ხარისხის კომაშია.

"შემთხვევა მოხდა წუხელ, დაახლოებით 19:00 საათზე, სოფლის ცენტრში და როგორც თვითმხილველებმა მითხრეს, დიდი სიჩქარით მომავალი მსუბუქი ავტომანქანა, რომელსაც მართავდა შსს დარჩელის საუბნო პოლიციის თანამშრომელი კობა კვინტაძე, სხვა ავტომანქანასთან შეჯახების თავიდან აცილების მიზნით, გადავიდა ტროტუარზე და დაეჯახა 24 წლის მურმან კალანდიას, რომელიც გადააგდო დიდ მანძილზე.

თვითმხილველებმა გვითხრეს, რომ კობა კვინტაძე იყო მთვრალი, რაც დამიდასტურეს სხვა მაღალჩინოსანმა პოლიციელებმაც.

მურმან კალანდიას ჩაუტარდა თავის ტვინის ნეიროქირურგიული ოპერაცია. ექიმის განმარტებით, მისი მდგომარეობა არის უმძიმესი და აქვს მეოთხე ხარისხის კომა.

მურმანს ჰყავს ორსული ცოლი და მძიმე შრომით ირჩენდნენ თავს," – ამბობს მაია კალანდია.

პოლიციელების ნასვამ მდგომარეობაში ყოფნაზე საუბრობს აქტივისტი მარიამ სიჭინავაც, რომელიც ამ ფაქტს ფეისბუქ-პოსტში გამოეხმაურა. აქტივისტის განცხადებით, კობა კვინტაძე მის საქმეში ცრუ მოწმე იყო და პოლიციელების არაფხიზელ მდგომარეობაში ყოფნის შემთხვევებსაც იხსენებს.

"რადგან ასე გახმაურდა ამბავი პოლიციელზე, რომელიც ნასვამ მდგომარეობაში 24 წლის ბიჭს დაეჯახა, კი, ჩემი დამკავებელი და ცრუ მოწმე იყო, მაგრამ ეს ამ ყველაფერთან საერთოდ არაფერ შუაშია.

მთავარი ამბავი არის ის, რომ ზუგდიდში აქციებზე არაერთხელ გვინახავს პოლიციელი, რომელიც ნასვამია და ასრულებს სამსახურებრივ მოვალეობას.

მსგავს მდგომარეობაში იყო სოფელ ნარაზენის პოლიციის უფროსიც, რომელიც ჯერ დამემუქრა რომ დამმარხავდა და შემდეგ სიტყვიერი შეურაცხყოფა მომაყენა.

პოლიციელების სიმთვრალეს აქვს სისტემური ხასიათი, ისინი სარგებლობენ იმ ძალაუფლებით, რომელიც მუნდირის ტარებით მიიღეს და მართავენ მანქანებსაც," – წერს აქტივისტი.

ბათუმელების ცნობით, გენერალურ პროკურატურაში განაცხადეს, რომ ავტოავარიის მონაწილე პოლიციელი დაკავებულია.

გამოძიება დაწყებულია სისხლის სამართლის კოდექსის 276-ე მუხლის მე-5 ნაწილით.