სირიაში ბაშარ ალ-ასადის დამხობის შემდეგ ყველაზე დიდი სისხლისღვრა დატრიალდა — სანაპირო რეგიონში მიმდინარე სამხედრო დაპირისპირებას 1000-ზე მეტი ადამიანი ემსხვერპლა.

შეტაკება ისლამისტურ ხელისუფლებასა და ალავიტთა შეიარაღებულ ფორმირებებს შორის მოხდა, რომლებიც ბაშარ ალ-ასადს უჭერენ მხარს (რომელიც, თავის მხრივ, სწორედ ალავიტთა სექტის წარმომადგენელი იყო).

მსხვერპლთა შორის ასეულობით მშვიდობიანი ალავიტი მოქალაქე მოხვდა, რაც უფლებადამცველებმა მიზანმიმართულ შურისძიებად შეაფასეს.

როგორ დაიწყო ძალადობა?

შეტაკება 6 მარტს დაიწყო, როცა, სირიის ხელისუფლების ცნობით, სანაპირო რეგიონში ასადის რეჟიმის მხარდამჭერებმა თავდასხმა წამოიწყეს. სუნიტურმა ისლამისტურმა მთავრობამ რეგიონში დამხმარე რაზმები გაგზავნა, რათა, ოფიციალური ვერსიით, "ასადის მთავრობის ნარჩენების მომაკვდინებელი, კარგად დაგეგმილი და წინასწარ ჩაფიქრებული" თავდასხმა აღეკვეთათ.

როგორც კი დამხმარე ძალები რეგიონს მიუახლოვდნენ, ახალი ადმინისტრაციის მომხრე მეჩეთებმა ხალხს ჯიჰადისკენ და თავდაცვის ძალების დახმარებისკენ მოუწოდეს. 7 მარტის დილით გავრცელდა ცნობები იმის შესახებ, რომ ალავიტების ქალაქებსა და სოფლებში უამრავი მშვიდობიანი მოქალაქე დახოცეს. Syrian Observatory-მ, რომელიც ბრიტანული Human Rights-ის შვილობილი ორგანიზაციაა, განაცხადა, რომ ახალი ხელისუფლების მხარდაჭერილმა ძალებმა 973 ალავიტი მოქალაქე მოკლეს.

გარდა ამისა, შეტაკებებში დაიღუპა 250 ალავიტი მებრძოლი და 230-ზე მეტი სამთავრობო ჯარისკაცი.

ვინ არიან ალავიტები?

ალავიტთა სექტა სუნიტი მუსლიმების შემდეგ, სირიაში უდიდესი რელიგიური ჯგუფია. მათი სარწმუნოება შიიტური ისლამის განშტოებაა.

ბაშარ ალ-ასადი ალავიტური ჯგუფიდან გამოყვანილ ჯარისკაცებს ეყრდნობოდა არმიასა და უსაფრთხოების სამსახურებში, რადგან, როგორც აღინიშნა, თავად ასადიც ალავიტია. 2011 წელს სამოქალაქო ომის დაწყებამ ორი რელიგიური ჯგუფი ერთმანეთთან უკიდურესად დააპირისპირა — ალავიტებს აქტიურად უჭერდნენ მხარს შიიტური ირანისა ხელისუფლება და ლიბანური ჰეზბოლა.

სირიის ახალმა ლიდერმა, აჰმედ ალ-შარამ, 2015 წელს (როცა მისი ორგანიზაცია ჯერ კიდევ ალ-ქაიდას განშტოება იყო), Al Jazeera-სთან ინტერვიუში განაცხადა, რომ ალავიტთა სექტა "ისლამისგან გასულია" და მათ რწმენის შეცვლისკენ მოუწოდა. ასადის დამხობის შემდეგ, ალ-შარამ განაცხადა, რომ სირიის მართვას ინკლუზიური გზით აპირებს, თუმცა ალავიტთა წარმომადგენლებს არ შეხვედრია.

ალ-შარამ განაცხადა, რომ ასადის მხარდამჭერები სირიის ახალ სამოქალაქო ომში გახვევას ცდილობენ და ამის თავიდან ასარიდებლად, შეიქმნება კომისია, რომელიც გამოიძიებს მშვიდობიანი მოქალაქეების დახოცვის ფაქტებს და ყველა პასუხისმგებელი პირი დაისჯება.

ძალადობამ საერთაშორისო განგაში გამოიწვია. აშშ-მ მოუწოდა სირიის ხელისუფლებას, დასაჯოს "რადიკალი ისლამისტი ტერორისტები", რომელთაც ხალხი დახოცეს.

ისრაელის თავდაცვის მინისტრმა ისრაელ კაცმა X-ზე დაწერა, რომ ალავიტების წინააღმდეგ განხორციელებულმა ქმედებებმა ალ-შარას ჯიჰადისტური "ნამდვილი" სახე გამოაჩინა.