8 მარტს, 19:00-ზე რესპუბლიკის მოედნიდან პარლამენტამდე ქალების მარში გაიმართება.

მარშის ორგანიზატორები აცხადებენ, რომ ნეტგაზეთისა და ბათუმელების დირექტორი მზია ამაღლობელი ავტორიტარული რეჟიმის მსხვერპლი და თავისუფლებისთვის ბრძოლის სიმბოლოა დღეს.

"2025 წლის 8 მარტს საქართველოში პირველად ვხვდებით ქალ პოლიტპატიმრებთან ერთად — მზია ამაღლობელი, ავტორიტარული რეჟიმის მსხვერპლი და თავისუფლებისთვის ბრძოლის სიმბოლოა დღეს.

მასთან ერთად, არც სხვა ქალები ვეგუებით საქართველოში ჩამოყალიბებულ ავტორიტარიზმსა და პოლიციურ რეჟიმს, რომელმაც დაამწყვდია უდანაშაულო ადამიანები ციხეში, უგულებელყო საქართველოს კონსტიტუცია და ადამიანის ფუნდამენტური უფლებები, შეურაცხყოფას აყენებდა მოშიმშილე მზია ამაღლობელს, აწამა მშვიდობიანი მანიფესტანტები და თავისი ყოველდღიური ქმედებით მიჰყავს საქართველო სულ უფრო და უფრო ღრმა კრიზისამდე.

სწორედ ამ რეჟიმის წინააღმდეგ, 8 მარტს, ქალთა საერთაშორისო დღეს, რომელსაც ქალთა მოძრაობა ყოველწლიურად ვუძღვნით ქვეყნისთვის მნიშვნელოვან საკითხებს, ქალები რესპუბლიკის მოედანზე შევიკრიბებით და რუსთაველისკენ მსვლელობას გავმართავთ.

ამ პროტესტს ქალის ხმა აქვს!

8 მარტს, 19:30 საათზე, შემოგვიერთდი რესპუბლიკის მოედანზე და ერთად გავაგონოთ რეჟიმს გაბრაზებული ქართველი ქალების ხმა!" — ვკითხულობთ ორგანიზატორების განცხადებაში.

თბილისის გარდა, 8 მარტს მარშები გაიმართება სხვა ქალაქებშიც:

ქუთაისი

შეკრების ადგილი: მე-3 სკოლა
შეკრების დრო: 19:00 საათი

ბათუმი

შეკრების ადგილი: მემედ აბაშიძის 48 (გაზეთ "ბათუმელების" ოფისთან)
შეკრების დრო: 18:00 საათი

შეგახსენებთ, 7 მარტს, უწყვეტი პროტესტის მე-100 დღეს, თბილისსა და საქართველოს 8 დიდ ქალაქში 15 აქცია-მსვლელობა გაიმართება.

დედაქალაქის გარდა საპროტესტო აქციები გაიმართება ქვეყნის დიდ ქალაქებში: ქუთაისში, ბათუმში, ზუგდიდში, თელავში, ახმეტაში, გორში, ახალციხესა და ჩხოროწყუში.

ასევე იხილეთ:

უწყვეტი პროტესტის მე-100 დღეს, თბილისსა და რეგიონებში 15 აქცია-მსვლელობა გაიმართება