უნგრეთის პრემიერმინისტრმა ვიქტორ ორბანმა განაცხადა, რომ ის უნგრეთში გამოკითხვას ჩაატარებს, რათა გაარკვიოს, სურთ თუ არა უნგრელებს უკრაინის ევროკავშირში გაწევრიანება.

"ჩვენ გვაქვს ის, რასაც ჰქვია ეროვნული საკონსულტაციო სქემა, რომელსაც რეგულარულად ვიყენებთ იმის გასარკვევად, თუ რას ფიქრობს ხალხი, ამიტომ ახლაც გამოვიყენებთ ამ სქემას. უნგრელებს აქვთ შანსი გადაწყვიტონ, მხარს უჭერენ თუ არა უკრაინის ევროკავშირში გაწევრიანებას", — თქვა ორბანმა.

როგორც უკრაინული მედია წერს, 2010 წლიდან ორბანის მთავრობამ ათზე მეტი ე.წ. ეროვნული კონსულტაციები გამართა სხვადასხვა საკითხებზე, მიგრაციიდან დაწყებული ლგბტქ+ უფლებებით დამთავრებული.

ზრდასრულ მოსახლეობას ეგზავნება წერილები, სადაც უსვამენ კითხვებს და სთხოვენ აირჩიონ რამდენიმე პასუხიდან ერთ-ერთი, ზოგჯერ უბრალოდ უპასუხონ "დიახ" ან "არა".

კითხვები ხშირად ფორმულირებულია პრევენციულად და პასუხების დიდი უმრავლესობა, როგორც უნგრული მედია იუწყება, ემთხვევა მთავრობის პოზიციას. ამიტომ ოპოზიცია და სამოქალაქო საზოგადოება ამ მექანიზმს პროპაგანდისტულ იარაღად მიიჩნევს.

მაგალითად, 2023 წელს ევროკავშირის მიგრაციის პოლიტიკის შესახებ ეროვნული კონსულტაციის დროს უნგრელებს ჰკითხეს, მხარს უჭერდნენ თუ არა ისინი ბრიუსელს უნგრეთში "მიგრანტების გეტოს" შექმნას. მაშინ გამოკითხვაში უნგრელების 20%-ზე ნაკლებმა მიიღო მონაწილეობა, მაგრამ მათმა 99%-მა თქვა "არა".

ეროვნული კონსულტაციების შედეგები არ არის იურიდიულად სავალდებულო, მაგრამ ისინი გამოიყენება ორბანის მთავრობის პოზიციის გასაძლიერებლად ისეთ საკითხებზე, რომლებიც უთანხმოებას იწვევს. მათ საფუძველზე ორბანს შეუძლია განაცხადოს, რომ გარკვეულ პოზიციას მხარს უჭერს ამომრჩეველთა უმრავლესობა.

უკრაინასთან დაკავშირებით უნგრეთის მთავრობამ უკვე გამართა "კონსულტაციები". კითხვები ეხებოდა უკრაინის ომს, უკრაინის ევროკავშირში გაწევრიანებას, ასევე კომუნალურ გადასახადებს, საპროცენტო განაკვეთების გაყინვას, დამატებით მოგებაზე გადასახადს, უნგრეთის პოლიტიკაზე საგარეო გავლენას და ბავშვთა დაცვის კანონს.

უკრაინასთან დაკავშირებული ოთხი საკითხი იყო, ყველა მანიპულირებულად იყო ჩამოყალიბებული. იმ დროს უნგრეთის მთავრობამ განაცხადა, რომ უნგრელების 98% მხარს უჭერდა მის პოლიტიკას.

მანამდე უნგრეთის მთავრობამ გამართა კონსულტაციები ანტირუსულ სანქციებზე — იმ დროს უნგრელების 97% თითქოსდა მათ წინააღმდეგ გამოდიოდა.