იტალიის პრემიერმინისტრმა ჯორჯია მელონიმ წამოაყენა ინიციატივა, ჩრდილო ატლანტიკური ხელშეკრულების მე-5 მუხლის გარანტიები უკრაინაზე გავრცელდეს მისი ალიანსში ფორმალური გაწევრიანების გარეშე. იგი თვლის, რომ ეს უკრაინის გრძელვადიან და ეფექტურ უსაფრთხოებას უზრუნველყოფს. ამის შესახებ მელონიმ FT-ს განუცხადა.

მელონის თქმით, უკრაინის NATO-ს კოლექტიური უსაფრთხოების გარანტიების მიწოდება ფორმალური წევრობის გარეშე უფრო ეფექტური იქნება, ვიდრე სხვა ვარიანტები, კერძოდ, სამშვიდობო ძალების შემოყვანა ცეცხლის შეწყვეტის მონიტორინგისთვის.

"უკრაინაზე იგივე დაცვის გავრცელება, რაც NATO-ს ქვეყნებს აქვთ, რა თქმა უნდა, ბევრად უფრო ეფექტური იქნება, თუმცა ეს იქნება რაღაც განსხვავებული NATO-ს წევრობისგან. ვფიქრობ, ეს იქნება უსაფრთხოების სტაბილური, გრძელვადიანი, ეფექტური გარანტია, ბევრად უკეთესი ვიდრე ზოგიერთი წინადადება, რასაც მე ვხედავ," — თქვა მელონიმ.

კითხვაზე, თუ რა განსხვავებაა მელონის წინადადებასა და უკრაინის NATO-ში სრულ გაწევრიანებას შორის, იტალიის მთავრობის სპიკერმა თქვა, რომ ეს ნაბიჯი უზრუნველყოფს ურთიერთდაცვითი პუნქტის გამოყენებას უკრაინის დასაცავად... თუნდაც NATO-ს მიღმა ტერიტორიაზე.

"დაუზუსტებელი სამხედრო კონტინგენტების გაგზავნა, ბრიტანული თუ სხვა, ყველაზე რთული და ალბათ ყველაზე ნაკლებად ეფექტური გამოსავალია. მე ამაზე ვისაუბრე, გავიმეორე და ასევე გამოვრიცხე იტალიის ჯარების გაგზავნა ამ კონტექსტში," - თქვა მელონიმ.

თებერვლის ბოლოს, იტალიის პრემიერმინისტრმა, ჯორჯია მელონიმ განაცხადა, რომ უკრაინის უსაფრთხოების ყველაზე ეფექტური გარანტია NATO-ში გაწევრიანებაა.

აშშ-ის პრეზიდენტმა დონალდ ტრამპმა 26 თებერვალს განაცხადა, რომ ის გამორიცხავს უკრაინის NATO-ში გაწევრიანებას. მან ასევე განაცხადა, რომ უკრაინაში რუსეთის სრულმასშტაბიანი შეჭრის მიზეზი, სავარაუდოდ, ალიანსი იყო, კერძოდ, დაპირება, რომ უკრაინა ერთ დღეს გახდება NATO-ს წევრი.

მანამდე აშშ-ს თავდაცვის მდივანმა პიტ ჰეგსეთმა ასევე გამორიცხა უკრაინის NATO-ში გაწევრიანება, როგორც ომის "მშვიდობიანი მოგვარების" ნაწილი.

ამავდროულად, უკრაინა აგრძელებს მტკიცებს, რომ არ ცვლის პოზიციას ჩრდილოატლანტიკურ ალიანსში გაწევრიანებასთან დაკავშირებით.