ჰარპერ ლის აქამდე უცნობი მცირე პროზა სულ მალე დღის სინათლეს იხილავს. თანამედროვე ამერიკელი კლასიკოსის ახალაღმოჩენილი მოთხრობები წელს წიგნად გამოიცემა. კრებული, სახელწოდებით საამური მარადისობის ქვეყანა, რვა უცნობ მოთხრობასა და რვა ადრე გამოქვეყნებულ ესეის გააერთიანებს.

მოთხრობები, რომლებიც კრებულში შევა, ლის გარდაცვალების შემდეგ, 2016 წელს, მწერლის ნიუ-იორკში მდებარე ბინაში აღმოაჩინეს. როგორც ცნობილია, ტექსტები მანამდე დაიწერა, სანამ ავტორი მუშაობას დაიწყებდა თავის საქვეყნოდ ცნობილ რომანზე ნუ მოკლავ ჯაფარას.

"მოხარული ვარ, რომ ვიპოვეთ და გამოვცემთ მოთხრობებს, რომელთა არსებობის შესახებაც კი ვიცოდით, მაგრამ მხოლოდ ცოტა ხნის წინ აღმოვაჩინეთ", — ამბობს ლის დისშვილი, ედვინ კონერი, — "იგი მხოლოდ ჩვენი საყვარელი დეიდა კი არა, დიდი ამერიკელი მწერალიც იყო და ალბათ ბოლომდე ვერასდროს გავიგებთ, როგორ მიაღწია ამხელა სიმაღლეს".

გამომცემლის ცნობით, მომავალი კრებული "შეუფასებელი მასალაა ყველასთვის, ვინც ლის მწერლად ჩამოყალიბებითაა დაინტერესებული". ამასთან, მკითხველისთვის სიახლე იქნება ისიც, რომ მოთხრობებში მოქმედება ალაბამასთან ერთად, მანჰეტენზე ვითარდება.

კადრი ფილმიდან ნუ მოკლავ ჯაფარას (1962)

ფოტო: John Springer Collection / Corbis

თავის სიცოცხლეში, ჰარპერ ლიმ მხოლოდ ორი წიგნი გამოსცა: ნუ მოკლავ ჯაფარას და მიდი, დააყენე დარაჯი. ეს უკანასკნელი მწერლის გარდაცვალებამდე სულ ცოტა ხნით ადრე გამოქვეყნდა, თუმცა, როგორც ვიცით, ნაწარმოები მის წინამორბედზე ადრე დაიწერა. მეტიც, მიდი, დააყენე დარაჯი თავდაპირველად ლის მომავალი შედევრის ერთგვარი მონახაზი ყოფილა.

აი, რაც შეეხება რომანს ნუ მოკლავ ჯაფარას, 1960 წელს გამოცემული ეს წიგნი დღეს უკვე ამერიკული ლიტერატურის კლასიკაა. ნაწარმოები ნათარგმნია 40-ზე მეტ ენაზე და მსოფლიოში 46 მილიონზე მეტ ეგზემპლარადაა გაყიდული. წიგნმა პულიცერის პრემიაც დაიმსახურა, მის მიხედვით კი რეჟისორმა რობერტ მალიგანმა ოსკაროსანი ფილმი გადაიღო.

ასევე იხილეთ:

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...