ელტონ ჯონი საგანგაშოდ მიიჩნევს პრეზიდენტ დონალდ ტრამპის მიერ შეერთებული შტატების საერთაშორისო განვითარების სააგენტოს (USAID) ბიუჯეტის შემცირებას, რადგან მძიმე დარტყმა მიადგება აივ-ის პრევენციის გლობალურ პროგრამას.

ტრამპის ადმინისტრაციამ მანამდე USAID-ის საგარეო დახმარების კონტრაქტების 90%-ით შემცირება დააანონსა, რაც მთელ მსოფლიოში 60 მილიარდი დოლარის ჰუმანიტარული დახმარების დაკარგვას ნიშნავს.

ჯონმა, რომლის Elton John AIDS Foundation 1992 წლიდან ლიდერობს გლობალურ ბრძოლას შიდსის წინააღმდეგ და მნიშვნელოვან დახმარებას უწევს აივ/შიდსით მცხოვრებ ადამიანებს, შაბათს ინსტაგრამზე განცხადება გაავრცელა. მან აღნიშნა, რომ ტრამპის „მოულოდნელ გადაწყვეტილებას“ შეუძლია „საშინლად დააზიანოს აივ-ის წინააღმდეგ ბრძოლა და წლების განმავლობაში მიღწეული პროგრესი წყალში ჩაყაროს“.

ჯონის თქმით, დაფინანსების სრული შეწყვეტამდე რესურსების დეფიციტის შესავსებად, ფონდი 90-ზე მეტ პარტნიორთან ერთად მუშაობს, რათა სიცოცხლისთვის აუცილებელი სერვისების მიწოდება არ შეწყვიტონ. ამასთან, შეიქმნა The Rocket Response Fund, რომელიც დაუყოვნებლივ დაფარავს კრიტიკულად მნიშვნელოვან ხარჯებს.

„მილიონობით ადამიანი დღეს ცოცხალია ამერიკელი ხალხის გულუხვობისა და ისეთი ეფექტური პროგრამების წყალობით, როგორიცაა PEPFAR. ახლა კი მათ აღარ იციან, როდის – ან საერთოდაც შეძლებენ თუ არა – მიიღონ სიცოცხლისთვის აუცილებელი მედიკამენტები,“ – აღნიშნა ჯონმა.

PEPFAR (პრეზიდენტის საგანგებო გეგმა შიდსთან ბრძოლისთვის) შიდსის წინააღმდეგ შექმნილი სახელმწიფო პროგრამაა, რომელიც 2003 წელს პრეზიდენტმა ჯორჯ ბუშმა დააფუძნა. ეს ინიციატივა პარტნიორ ქვეყნებთან ერთად ახორციელებს აივ/შიდსის პრევენციის, მკურნალობისა და მოვლის პროგრამებს, მათ შორის ანტირეტროვირუსული თერაპიის ხელმისაწვდომობის უზრუნველყოფას, რაც აივ-ინფიცირებულ ადამიანებს ვირუსის მართვაში ეხმარება.

„მიუხედავად იმ დიდი გაურკვევლობისა, რომელიც შიდსთან ბრძოლის დაფინანსების შემცირებას უკავშირდება,“ – დაწერა ჯონმა, – „ჩვენ მოვუწოდებთ აშშ-ის მთავრობას, გააგრძელოს ისეთი ორპარტიული სასიცოცხლო პროგრამების საქმიანობა, როგორიცაა PEPFAR.“