3 მარტს, 20:00 საათზე, ფილარმონიიდან პარლამენტამდე, დედების მარში გაიმართება. ორგანიზატორების თქმით, მარშში რეჟიმის ტყვეების დედებიც მიიღებენ მონაწილეობას.

"ჩვენ, დედები და ბებიები, რომლებიც ყოველდღიურად ვხედავთ დე ფაქტო მთავრობის ძალადობას ჩვენს შვილებსა და შვილიშვილებზე, შევიკრიბოთ ორშაბათს, 3 მარტს, 20 საათზე, ფილარმონიის წინ და გავმართოთ საპროტესტო მსვლელობა რუსთაველის გამზირისკენ.

ყველა ქალს, ვისთვისაც საკუთარი შვილებისა და ქვეყნის მომავალი მნიშვნელოვანია, მოგიწოდებთ, შემოუერთდეთ მსვლელობას.

ერთად დავიცვათ ჩვენი და მათი თავისუფლება!" — ვკითხულობთ მარშის ორგანიზატორების განცხადებაში.

მარშს საქართველოს მეხუთე პრეზიდენტი, სალომე ზურაბიშვილიც შეუერთდება. ამის შესახებ სალომე ზურაბიშვილი ფეისბუქის გვერდზე წერს და დედებს დღევანდელ დღეს ულოცავს.

"დედებო, გილოცავთ დედის დღეს, გილოცავთ თქვენ, ვისი შვილები უსამართლოდ პატიმრობაში იმყოფებიან და თქვენთან ვიქნები დღეს ფილარმონიასთან! დედებს ვერავინ, ვერასოდეს ვერ გვაჯობებს, ვერ გაგვაჩუმებს," — წერს ზურაბიშვილი.