ირლანდიამ ხუთშაბათს, 27 თებერვალს, საიმიგრაციო კანონების აღსრულების მიზნით, ჩარტერული რეისით, საქართველოში 32 საქართველოს მოქალაქე დაადეპორტა. ამის შესახებ ირლანდიური მედია წერს.

ჩარტერულმა რეისმა, რომლის ღირებულებაა 102,476 ევროა, დუბლინის აეროპორტი ხუთშაბათს ღამით დატოვა და თბილისში პარასკევს დილით ჩამოფრინდა.

დეპორტირებულებს, თან ახლდნენ ირლანდიელი სამართალდამცავები, სამედიცინო პერსონალი, თარჯიმანი და ადამიანის უფლებების დამცველი.

დეპორტირებულთა შორის იყო 28 მამაკაცი, სამი ქალი და ერთი ბავშვი.

ირლანდიური მედია წერს, რომ ეს იყო პირველი სადეპორტაციო ფრენა ნოემბერში ხელმოწერილი ახალი კონტრაქტის შემდეგ, რომელიც ჩარტერული თვითმფრინავების უზრუნველყოფას ითვალისწინებს და სამომავლოდ ფრენები კიდევ დაიგეგმება.

იუსტიციის მინისტრმა, ჯიმ ო'კალაგანმა სოციალურ ქსელში დაწერა, რომ დეპორტირებულები უსაფრთხოდ დაბრუნდნენ საქართველოში.

მინისტრის თქმით, მისთვის და ირლანდიის მთავრობისთვის მთავარი პრიორიტეტია, რომ ქვეყნის საიმიგრაციო კანონები იყოს ძლიერი და აღსრულებული.

მან ამ ფრენას დეპორტაციის ბრძანებების შესრულების უზრუნველსაყოფად "მნიშვნელოვანი ნაბიჯი" უწოდა და დასძინა, რომ სადეპორტაციო ფრენები კიდევ დაიგეგმება. მან ასევე მადლობა გადაუხადა მთავრობის წარმომადგენლებს გაწეული მუშაობისთვის.

საბინაო მოთხოვნაზე არსებული დაძაბულობის შესახებ ო'კალაგანმა თქვა, რომ უნდა "შეეცადონ ამ ზეწოლის შემცირება" და ადამიანებს უნდა მიაწოდონ ინფორმაცია იმის შესახებ, რომ მათი მოთხოვნა თავშესაფრის მიღებაზე, სავარაუდოდ, უარყოფილი იქნება.

"თუ ისინი ითხოვენ თავშესაფარს ირლანდიაში, ალბათობა - ცხადია, მოთხოვნა მაინც შეფასდება - სავარაუდოა, რომ თავშესაფარზე უარი გეთქვათ, თუ მას საქართველოდან მოითხოვთ", — განუცხადა მან RTÉ's Morning Ireland-ს.