საქართველოს შინაგან საქმეთა სამინისტრო ისრაელური კიბერუსაფრთხოების კომპანია Cellebrite-ისგან 6,796,092 ლარის ღირებულების მოწყობილობებისა და პროგრამულ უზრუნველყოფას ყიდულობს. ეს პროგრამა მობილურ ტელეფონებში, კომპიუტერებსა და სხვა ციფრულ ტექნოლოგიაში დაცული ინფორმაციის წაკითხვის საშუალებას იძლევა.

რა არის Cellebrite?


Cellebrite-ის პროდუქტებს აქტიურად იყენებენ აშშ-ის, ევროპისა და აზიის ქვეყნების სამართალდამცავი უწყებები. ეს საშუალება ძირითადად ტერორიზმთან ბრძოლისა და განსაკუთრებულად საშიში კრიმინალური დაჯგუფებების შესახებ ინფორმაციის გასაგებად გამოიყენება, თუმცა, კომპანია არაერთხელ გამხდარა კრიტიკის ობიექტი, რადგან მისი ტექნოლოგიები არაერთხელ გამოიყენეს სამოქალაქო თავისუფლებების შეზღუდვისთვის. სწორედ ამის გამო შეწყვიტა 2021 წელს კომპანიამ რუსეთთან და ბელარუსთან პარტნიორობა.

აღსანიშნავია, რომ Cellebrite-ს გაყიდვების მენეჯერი, ალბერტ კაცირი, შსს-სთან მიწერილ წერილში აღნიშნავს, რომ საქართველო კავკასიის რეგიონის ერთადერთი ქვეყანაა, რომლისთვისაც მათ საკუთარი ტექნოლოგიის მიყიდვა შეუძლიათ, თუმცა ეს შეიძლება მალე შეიცვალოს.

როგორ დავიცვათ ჩვენი პირადი ინფორმაცია Cellebrite-ს ტექნოლოგიისგან?


როგორც კიბერუსაფრთხოების ექსპერტები გვირჩევენ, Cellebrite-სგან თავისა და მობილური მოწყობილობების დაცვა რამდენიმე გზითაა შესაძლებელი.

  • თუ ისეთ მობილურ ტელეფონს ხმარობთ, რომელზეც სისტემური განახლებები აღარ გამოდის, გირჩევთ, შეცვალოთ მოწყობილობა. ასეთი ტელეფონებში შეღწევა Cellebrite-ს სისტემას ძალიან მარტივად შეუძლია.
  • როცა მოწყობილობა სისტემურ განახლებას გთავაზობთ, გაითვალისწინეთ რეკომენდაცია და განაახლეთ ტელეფონი.
  • დააყენეთ ძლიერი პაროლი — 4 ან მეტი სიტყვისგან შემდგარი, პაროლების გენერატორის მიერ შედგენილი კოდი. Cellebrite-ს სტანდარტული, 6-ციფრიანი პაროლით დაცულ მოწყობილობაში შეღწევა უმარტივესად შეუძლია. ასევე, რეკომენდებულია Face ID-ისა და თითის ანაბეჭდის ამოცნობის დაყენება მობილურის დასაცავად.
  • თუ ფიქრობთ, რომ საფრთხეში ხართ და შეიძლება ტელეფონი გარეშე პირებმა ჩამოგართვან, გათიშეთ მოწყობილობა.



ამ ყველაფერთან ერთად, დამატებითი ინფორმაციის მისაღებად შეგიძლიათ ეწვიოთ და გაეცნოთ კიბერუსაფრთხოების ვებსაიტს FOI.ge