საზოგადოებრივი მაუწყებელი აცხადებს, რომ 20 ახალი ავტომობილის შესაძენად გამოცხადებული ტენდერი ჩატარდა სახელმწიფო შესყიდვების შესახებ საქართველოს კანონის სრული დაცვით.

აღნიშნულ ტენდერში მონაწილეობდა ორი კომპანია - სს ფრანს ავტო და შპს ჯი-თი მოტორსი. როგორც მაუწყებელი აცხადებს, ელექტრონულ ტენდერში გამართული ვაჭრობის შედეგად, შესყიდვის ობიექტის სავარაუდო ღირებულება შემცირდა 73 165 ლარით. ჯი-თი მოტორსმა მაუწყებელს "სუზუკი ვიტარას" მარკის ავტომობილები შესთავაზა.

საბოლოოდ, საზოგადოებრივი მაუწყებელი 20 ახალ ავტომობილში შპს ჯი-თი მოტორსს 934 500 ლარს გადაუხდის.

დღეს On.ge-მ გაავრცელა ინფორმაცია აღნიშნულის შესახებ, რომლის მიხედვითაც, შპს ჯი-თი მოტორსის 100-პროცენტიანი წილის მფლობელი შპს ჯი-თი გრუპია, რომელიც გიორგი თავდიშვილს, გიორგი გველესიანსა და თემურ უსტიაშვილს ეკუთვნით. აუდიტის სამსახურის ვებგვერდის მონაცემებით, 2016 წელს შპს ჯი-თი მოტორსმა 2 200 ლარი, მისმა ორმა მფლობელმა გიორგი გველესიანსა და თემურ უსტიაშვილს კი, ჯამში, 120 ათასი ლარი შესწირეს ქართულ ოცნებას.

ტენდერში მონაწილე მეორე კომპანია ფრანს ავტოს მფლობელია იბერია ბიზნეს ჯგუფი, რომლის ერთ-ერთი მეწილეც სპორტისა და ახალგაზრულ საქმეთა მინისტრი ტარიელ ხეჩიკაშვილია.

საზოგადოებრივი მაუწყებელი გავრცელებულ განცხადებაში მედიასაშუალებას, რომელმაც ტენდერში გამარჯვებულების მიერ მმართველი პარტიისთვის თანხის შეწირვაზე ინფორმაცია გაავრცელა, პროფესიონალიზმს უწუნებს:

"სხვადასხვა მედიასაშუალების მიერ გამარჯვებული კომპანიის მფლობელთა პოლიტიკურ პრეფერენციებზე აპელირება მიგვაჩნია სახელმწიფო შესყიდვის პროცედურის სამართლიანობის ეჭვქვეშ დაყენების მცდელობად, არაპროფესიონალურად და არაკორექტულად, რადგან ელექტრონული ტენდერის მიმდინარეობის დროს გადამწყვეტია მონაწილე კომპანიისგან დაბალი ფასის შემოთავაზება. შესაბამისად, კომპანიამ შპს ჯი-თი მოტორსი ტენდერი მის მიერ შემოთავაზებული დაბალი ფასის გამო მოიგო".

საზოგადობრივი მაუწყებელი ასევე აცხადებს, რომ მაუწყებელში მიმდინარეობს რიგი ცვლილებები, რასთან დაკავშირებითაც სხვადასხვა პირებისა და ორგანიზაციების მხრიდან ხდება მიზანმიმართული დისკრედიტაციის მცდელობა და კონტექსტიდან ამოვარდნილი ინფორმაციით მანიპულირება.

"ყველას, ვინც კი დაინტერესებულია საზოგადოებრივი მაუწყებლის საქმიანობით, კიდევ ერთხელ მოგიწოდებთ, ობიექტურად მიუდგეთ და შეაფასოთ მაუწყებელში მიმდინარე ცვლილებები, რომელიც ორგანიზაციის გამართული მუშაობის მიღწევას ემსახურება", -ნათქვამია მაუწყებლის განცხადებაში.

დემოკრატიულ საზოგადოებაში დამოუკიდებელი მედიასაშუალების ერთ-ერთი მიზანია, საზოგადოებას მიაწოდოს ამომწურავი ინფორმაცია საბიუჯეტო რესურსების ხარჯვის შესახებ. On.ge, როგორც დამოუკიდებელი მედიასაშუალება, მკითხველს რეგულარულად აწვდის ინფორმაციას ბიუჯეტის ხარჯვაზე, მათ შორის, საზოგადოებრივი მაუწყებლის ბიუჯეტზე, რომელიც სახელმწიფოსგან 2017 წელს 46 მილიონზე მეტი ლარით დაფინანსდა.