ხალხის ძალის წევრმა დავით კაჭარავამ მედიასთან განაცხადა, რომ თავის დროზე სცადეს "სამშობლოს ღალატი საზოგადოებისთვის დიდ დანაშაულად აღარ დაენახებინათ" და ეს მუხლი ამოიღეს, მაგრამ ოცნების პარლამენტი სამშობლოს ღალატის მუხლს მხარს დაუჭერს.

"რაც შეეხება ღალატის მუხლს, ყველაფერს თავისი სახელი უნდა დაერქვას. თავის დროზე სცადეს, რომ სამშობლოს ღალატი საზოგადოებისთვის დიდ დანაშაულად აღარ დაენახებინათ და მისი სიმძიმე გაექროთ. მაგრამ, ჩვენ, რა თქმა უნდა, ამ კანონს მხარს დავუჭერთ, რადგან სამშობლოს ღალატი არის ის უმძიმესი ქმედება, რაც ადამიანმა შეიძლება ჩაიდინოს და ის კანონით უნდა ისჯებოდეს" — თქვა კაჭარავამ.

საქართველოს სისხლის სამართლის კოდექსისთვის სამშობლოს ღალატის მუხლის დამატების შესახებ ოცნების ერთ-ერთმა ლიდერმა, მამუკა მდინარაძემ 17 თებერვალს ბრიფინგზე განაცხადა.

მისი თქმით, ეს მუხლი ნაციონალურმა მოძრაობამ აგვისტოს ომამდე, 2007 წლის აპრილში ამოიღო.

"ჩვენი გადაწყვეტილებით, საქართველოს სისხლის სამართლის კოდექსს დაემატება, უფრო სწორი იქნება — აღდგება სისხლის სამართლის კოდექსში — სამშობლოს ღალატის მუხლი, რომელიც თავის დროზე ნაციონალურმა მოძრაობამ ამოიღო სისხლის სამართლის კოდექსიდან. რაც არ უნდა ვინმეს გაუკვირდეს, ან არ გაუკვირდეს, ან სიმბოლური იყოს ეს მოხდა აგვისტოს ომამდე. ეს გააკეთეს აგვისტოს ომამდე, 2007 წლის აპრილის თვეში", – ამის შესახებ ქართული ოცნების ერთ-ერთმა ლიდერმა, მამუკა მდინარაძემ ცოტა ხნის წინ ბრიფინგზე განაცხადა.