გერმანიის კანცლერმა ოლაფ შოლცმა კატეგორიულად უარყო აშშ-ის პრეზიდენტის დონალდ ტრამპის განცხადება, რომ უკრაინის ლიდერი ვოლოდიმირ ზელენსკი დიქტატორია. იმის თქმა, რომ პრეზიდენტ ზელენსკის არ აქვს დემოკრატიული ლეგიტიმაცია, უბრალოდ მცდარი და საშიშია, — განუცხადა შოლცმა ყოველკვირეულ Der Spiegel-ს ოთხშაბათს, 19 თებერვალს.

ინფორმაციას DW ავრცელებს.

"სიმართლე ისაა, რომ ვოლოდიმირ ზელენსკი უკრაინის სახელმწიფოს კანონიერად არჩეული მეთაურია. ის, რომ ომის პირობებში შეუძლებელია სათანადო არჩევნების ჩატარება, შეესაბამება უკრაინის კონსტიტუციისა და საარჩევნო კანონების დებულებებს. და არავის აქვს უფლება საპირისპირო პრეტენზია ჰქონდეს", — ხაზგასმით აღნიშნა გერმანიის მთავრობის მეთაურმა.

მან გაიხსენა, რომ სწორედ რუსეთმა, ვლადიმერ პუტინის მეთაურობით, წამოიწყო ომი უკრაინის წინააღმდეგ. "უკრაინა თითქმის სამი წელია იცავს თავს დაუნდობელი რუსული აგრესიისგან. ყოველდღე", — თქვა შოლცმა.

ზელენსკის შესახებ ტრამპის განცხადებები გააკრიტიკეს გერმანიის საგარეო საქმეთა მინისტრმა ანალენა ბერბოკმა და ეკონომიკის ფედერალური სამინისტროს ხელმძღვანელმა, ვიცე-კანცლერმა რობერტ ჰაბეკმა.

"თუ უფრო ახლოს დააკვირდებით რეალურ სამყაროს, ცხადი გახდება, თუ ვინ არის ევროპაში, სამწუხაროდ, იძულებული იცხოვროს დიქტატურის ქვეშ: ესენი არიან ხალხი რუსეთში, ხალხი ბელორუსიაში. უკრაინელები ყოველდღე იბრძვიან თავიანთი თავისუფალი დემოკრატიისთვის და ჩვენ, როგორც ევროპელები, მხარს ვუჭერთ მათ ევროკავშირისკენ მიმავალ გზაზე, რათა ერთად გავაძლიეროთ ჩვენი დემოკრატიული სახელმწიფოები", — დასძინა გერმანიის საგარეო საქმეთა სამინისტროს ხელმძღვანელმა ZDF-თან ინტერვიუში.

ვიცე-კანცლერმა რობერტ ჰაბეკმა X-ზე დაწერა, რომ ტრამპის განცხადებები რეალობის უპრეცედენტო დამახინჯებაა.

"აშშ-ის პრეზიდენტის განცხადება შოკისმომგვრელია. ეს არის რეალობის უპრეცედენტო დამახინჯება და უკიდურესად საშიში რიტორიკა. სიმართლე ისაა, რომ დიქტატორი პუტინი თავს დაესხა დემოკრატიულ უკრაინას", — წერს თავის მხრივ რობერტ ჰაბეკი სოციალურ ქსელ X-ში.

შეგახსენებთ, 19 თებერვალს აშშ-ის პრეზიდენტმა, დონალდ ტრამპმა სოციალურ ქსელში ვრცელი პოსტი გამოაქვეყნა, რომელიც სრულად უკრაინის პრეზიდენტის, ვოლოდიმირ ზელენსკის კრიტიკას მიეძღვნა. ტრამპმა ზელენსკის დიქტატორიც კი უწოდა და არჩევნების დანიშვნისკენ მოუწოდა.