საფრანგეთის საგარეო საქმეთა მინისტრმა მიუნხენის უსაფრთხოების კონფერენციაზე საქართველოს შესახებ ისაუბრა. ჟან-ნოელ ბარომ ხაზი გაუსვა რუსთაველის გამზირზე მიმდინარე საპროტესტო აქციებს და განაცხადა, რომ ქართველი ხალხი ევროპაში ხედავს უსაფრთხოებას და ამისთვის იბრძვის.

"პირველ რიგში, საშუალება მომეცით შევეწინააღმდეგო რაიმე ფორმით "ევროპასთან ჩხუბს" და ევრო-პესიმიზმს. ბევრი ჩვენგანი ამაყი ვართ, ვთქვათ, რომ გვჯერა — ევროპა სუპერძალაა. ევროპა ადგილია, სადაც COVID-19-ს ყველაზე ეფექტიანად შეებრძოლნენ. ევროპა კონტინენტია, რომელმაც წინააღმდეგობა გაუწია რუსეთის ფართომასშტაბიან შეჭრას, რომელიც თითქმის "მსოფლიოს უძლიერესი სამხედრო ძალა" უნდა ყოფილიყო, მაგრამ თავის მიზნებს ვერ მიაღწია. როდესაც საქმე ტექნოლოგიებს ეხება, რა მხრივაც მიიჩნევა, თითქოს ევროპა ჩამორჩება, მინდა აღვნიშნო, რომ მიმდინარე კვირას, ორშაბათს, პარიზში 300 მილიარდი დოლარი, მსოფლიოს მასშტაბით, ინვესტორების მიერ ჩაიდო ევროპაში მასიური კომპიუტერული შესაძლებლობების გასავითარებლად. ასე რომ, ზოგიერთი ბრძოლა წავაგეთ, მაგრამ ომი არ წაგვიგია, ტექნოლოგიური ომიც კი.

თუ ამ არგუმენტებით დარწმუნებულები ისევ არ ხართ, შეხედეთ ხალხს ევროპის გარეთ და რამდენად ძლიერია მათი ევროპული მისწრაფებები, თუ უკრაინელები კვლავ არიან ჩართულები რუსეთის წინააღმდეგ გმირულ წინააღმდეგობის ომში, ეს ყველაფერი მაიდანზე დაიწყო, ევროპის დროშით ხელებში. ვინ დაიკავა მათი ადგილი დღეს? ქართველმა ხალხმა, რომელიც ყოველ ღამე წინააღმდეგობას უწევს მთავრობას, რომელიც ცდილობს, ისინი ევროპულ გზას დააშოროს — ისინი თავიანთ ევროპის დროშებს აფრიალებენ, მღერიან ევროპულ ჰიმნს, რადგან ხედავენ, რომ ევროპა არის დემოკრატია, ევროპა არის თავისუფლება და ევროპა არის სუპერძალა, რომელსაც მათი დაცვა შეუძლია", — განაცხადა საფრანგეთის საგარეო საქმეთა მინისტრმა.