აშშ-ის თავდაცვის მინისტრმა, პიტ ჰეგსეთმა ბრიუსელში, უკრაინის საკითხებთან დაკავშირებული საკონტაქტო ჯგუფის შეხვედრაზე, რამდენიმე მნიშვნელოვანი განცხადება გააკეთა. ჰეგსეთის თქმით, "არარეალისტურია" რუსეთის აგრესიის მსხვერპლი სახელმწიფოს NATO-ში გაწევრიანების პერსპექტივები, ისევე, როგორც ქვეყნის 2014 წლამდელ საზღვრებში დაბრუნების შანსები.

ჰეგსეთის განცხადებით, უკრაინა რუსეთთან შეთანხმებისთვის უნდა მოემზადოს, რომელსაც ზურგს საერთაშორისო სამშვიდობო მისია გაუმაგრებს.

მოკავშირეები ჰეგსეთისგან იმის მოსმენას ელოდნენ, თუ რა მასშტაბით დაეხმარებოდა აშშ ომში მყოფ ქვეყანას, თუმცა ამის ნაცვლად, ჰეგსეთმა გაიმეორა დონალდ ტრამპის პოზიცია იმასთან დაკავშირებით, რომ უკრაინის დაცვაზე პასუხისმგებლობა და ფინანსური დახმარების დიდი ნაწილი ევროპამ უნდა გაიღოს. ევროპული უნდა იყოს სამშვიდობო კონტიგენტიც, რომელიც კონფლიქტის საზღვარზე განლაგდება — ჰეგსეთმა ამერიკელი სამშვიდობოების უკრაინაში გაგზავნა გამორიცხა. აშშ-ის თავდაცვის მინისტრმა განაცხადა ისიც, რომ სამშვიდობოები არ უნდა იყონ წარგზავნილი ნატოს წესდების მე-5 მუხლის "ქოლგით", რაც კოლექტიურ თავდაცვას ითვალისწინებს.

ჰეგსეთმა თქვა ისიც, რომ მოკავშირეებმა უნდა აღიარონ, რომ უკრაინა ვერ დაუბრუნდება 2014 წლამდელ საზღვრებს.