ბენიამინ ნეთანიაჰუმ ვიდეომიმართვაში გაიმეორა და დაადასტურა დონალდ ტრამპის მიერ გამოთქმული მოსაზრება იმასთან დაკავშირებით, რომ თუ შაბათს შუადღემდე ყველა ტყვე არ გათავისუფლდება, ისრაელი ჰამასის წინააღმდეგ საბრძოლო მოქმედებებს განაახლებს.

"თუ ჰამასი არ დააბრუნებს ჩვენს მძევლებს შაბათის შუადღისთვის, მაშინ ცეცხლის შეწყვეტის რეჟიმი დასრულდება, ისრაელის თავდაცვის ძალები ინტენსიურ ბრძოლას დაუბრუნდებიან მანამდე, სანამ ჰამასი საბოლოოდ არ დამარცხდება", — განაცხადა ისრაელის პრემიერმინისტრმა.

შეთანხმების პირობების თანახმად, შაბათს სამი ისრაელელი მძევლის გათავისუფლება იგეგმებოდა, თუმცა, ჰამასი ისრაელს შეთანხმების პირობების დარღვევაში ადანაშაულებს და რამდენიმე დღის წინ განაცხადა, რომ ამ მომენტისთვის მძევლების გათავისუფლებას წყვეტს.