სურსათის ეროვნულმა სააგენტომ პურ-ფუნთუშეულის მწარმოებელ კომპანია "იფქლს" საწარმოო ხაზი კრიტიკული შეუსაბამობის გამო გაუჩერა.

საინფორმაციო პლატფორმა Momxmarebeli.ge-მ დღეს დაწერა, რომ მომხმარებელმა სურსათის ეროვნულ სააგენტოს (სეს) წერილი მისწერა, რომელშიც აღნიშნა, რომ შპს "იფქლის" მიერ წარმოებულ შეფუთულ თეთრ პურში უცხო სხეული აღმოაჩინა.

5 თებერვალს მოქალაქემ სეს-იდან მიიღო პასუხი, რომლის თანახმადაც სააგენტომ შეამოწმა საწარმო და დააფიქსირა არაკრიტიკული და კრიტიკული შეუსაბამობები. გარდა ამისა, გამოვლინდა, რომ შპს "იფქლი", საქართველოს კანონმდებლობის შესაბამისად არ არის რეგისტრირებული სურსათის ბიზნესოპერატორად. აქედან გამომდინარე, "იფქლი" დაჯარიმდა 1000 ლარით და შეუჩერდა საწარმოო პროცესი, რომელიც აღდგება კრიტიკული შეუსაბამობების აღმოფხვრისა და კანონმდებლობის შესაბამისად რეგისტრაციისთანავე.

საინფორმაციო სააგენტო BM.GE-ს ცნობით, კომპანია აცხადებს, რომ საწარმოო პროცესი სრულად გაჩერებული არ არის და შემოწმების შედეგად მხოლოდ ერთი ხაზი გაჩერდა. კომპანიაში ირწმუნებიან, რომ "იფქლის" წარმოების პური "ორი ნაბიჯის" ქსელში არ იყიდება და მომხმარებლის მიმართვა მათ პურს არ ეხებოდა.

ფოტო: momxmarebeli.ge