"რაც შეეხება გახარიას პარტიას, არც მისი ადგილი არ არის საქართველოს პარლამენტში, ზოგადად, არც ერთი უცხოელი აგენტის ადგილი არ არის საქართველოს პარლამენტში", — ამის შესახებ ყაზახეთში, სამუშაო ვიზიტით ჩასულმა ოცნების პრემიერმინისტრმა ირაკლი კობახიძემ განაცხადეს, როცა ჟურნალისტებმა დაუსვეს კითხვა — სხვა ოპოზიციური პარტიების განსხვავებით რატომ არ შეუწყდა გიორგი გახარიას პარტიას მანდატები იმის მიუხედავად, რომ გახარია საქართველოსთვის არ აღიარებს არჩევნების შედეგებს.

ოცნების პრემიერმა გახარიას პარტიას "ნაც-მოძრაობის ბოლო წარმომადგენელი" და უცხოელი აგენტი უწოდა და იმედი გამოთქვა, რომ მომავალში მათაც შეუწყდებათ მანდატები და პარლამენტში მხოლოდ ეროვნული ინტერესის გამტარებელი პირები დარჩებიან.

"რა თქმა უნდა, მანდატების შეწყვეტას არ ჰქონდა ალტენატივა. რაც შეეხება გახარიას პარტიას, არც მისი ადგილი არ არის საქართველოს პარლამენტში, ზოგადად, არც ერთი უცხოელი აგენტის ადგილი არ არის საქართველოს პარლამენტში. საქართველოს პარლამენტში ექსკლუზიურად უნდა იყვნენ წარმოდგენილი ის ადამიანები, რომლებიც ემსახურებიან საქართველოს ეროვნულ ინტერესებს. ვნახოთ, რა იქნება მომავალში. აქ ორი თეორიული ვარიანტი არსებობს, რომ მათაც [გახარიას პარტიამაც] შეუწყდეს მანდატები, რაც არის მხოლოდ და მხოლოდ მისასალმებელი. ერთი თუ გააცდენენ ამ სესიის რომელიმე სხდომას, მეორე — თუ თვითონ დაწერენ განცხადებას. საუკეთესო ვარიანტი იქნება ჩვენი დემოკრატიის გაჯანსაღებისთვის ამ პოლიტიკურ პარტიასაც, ნაც-მოძრაობის ბოლო წარმომადგენელსაც თუ შეუწყდებათ მანდატები," — განაცხადა ოცნების პრემიერმინისტრმა ირაკლი კობახიძემ ჟურნალისტებთან საუბრისას.

შეგახსენებთ, 5 თებერვალს, ოცნების პარლამენტმა სამი პოლიტიკური გაერთიანების 49 ოპოზიციონერ დეპუტატს უფლებამოსილების ვადა შეუწყვიტა. რის შემდეგაც — 150-წევრიანი პარლამენტი 101-წევრიანი გახდა. ეს ის პოლიტიკური გაერთიანებებია, რომელთაც 26 ოქტომბრის საპარლამენტო არჩევნებში ბარიერი გადალახეს, მაგრამ არჩევნების შედეგები არ აღიარეს და სადეპუტატო მანდატების შეწყვეტა მოითხოვეს. ოცნების პარლამენტისთვის მანდატების გაუქმების მოთხოვნით არ მიუმართავს მხოლოდ გიორგი გახარიას პარტია გახარიას საქართველოსთვის.