მმართველმა პარტიამ ევროსაბჭოს საპარლამენტო დელეგაციიდან (PACE) წევრები გაიწვია. ამის შესახებ ინფორმაციას ინტერპრესნიუსი ავრცელებს. მათი ცნობით, საპარლამენტო დელეგაციაში ქართული ოცნებისა და ხალხის ძალის წევრებმა მათი უფლებამოსილების შეწყვეტის თაობაზე ასამბლეის პრეზიდენტს ინდივიდუალურად მიმართეს.

პარლამენტის ბიურომ ევროსაბჭოს საპარლამენტო ასამბლეიდან წევრების გაწვევის საკითხს მხარი დაუჭირა.

პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ განაცხადა, რომ "წევრების გამოწვევის მიუხედავად, დელეგაცია არ უქმდება, დელეგაცია რჩება".

ევროსაბჭოს საპარლამენტო დელეგაციაში დელეგაციის წევრები იყვნენ: თეა წულუკიანი, გივი მიქანაძე, მარიამ ლაშხი, ეკა სეფაშვილი, ასევე სათადარიგო კვოტით — ლევან მაჭავარიანი, რატი იონათამიშვილი და ზვიად შალამბერიძე.

ოცნების დელეგაციამ PACE 29 იანვარს, მას შემდეგ დატოვა, რაც ასამბლეამ საქართველოს შესახებ რეზოლუცია მიიღო, სადაც PACE ოცნებას ვადამდელი არჩევნების დანიშვნას და პოლიტპატიმრების გათავისუფლებისკენ მოუწოდებდა. ამას გარდა, მომდევნო სესიამდე, რომელიც აპრილში გაიმართება ოცნების დელეგაციას შეზღუდული უფლებამოსილება ექნება.